काभा भलिबलमा नेपालको दोस्रो जित

नेपालले श्रीलंकामा जारी काभा पुरुष भलिबल च्यालेन्ज कपको आफ्नो तेस्रो खेलमा अफगानिस्तानमाथि रोमान्चक जित हात पारेको छ । आज भएको खेलमा नेपालले अफगानिस्तानलाई ३–२ को सेटमा पराजित गर्दै दोस्रो जित हात पारेको हो । पहिलो सेट जितेपनि नेपालले त्यसपछि लगातार दुई सेट गुमाएपछि एक समय २–१ ले पछि थियो । तर चौथो र पाँचौं सेटमा जितका साथ नेपालले खेल जितेको हो । नेपालले अफगानिस्तानलाई २५–१९, १९–२५, २२–२५, २५–२१ र १५–१० ले हराएको हो । नेपालले यसअघिका दुई मध्ये एक खेलमा जित र अर्कोमा हार बहोरेको थियो । नेपालले पहिलो खेलमा बंगलादेशलाई हराएको थियो भने दोस्रो खेलमा आयोजक श्रीलंकासँग पराजित भएको थियो । नेपालले असोज २६ गते साउदीसँग र असोज २७ गते उज्वेकिस्तानसँग खेल्नेछ । ६ टोलीको सहभागिता रहेको च्यालेन्ज कपमा राउन्ड रोविन लिगपछि अंकतालिकाका शीर्ष २ टोलीले फाइनल तथा त्यसपछिका दुई टोलीले तेस्रो स्थानका लागि प्रतिस्पर्धा गर्नेछन् । फाइनल र तेस्रो स्थानको खेल असोज २८ गते हुनेछ ।