दिव्य समिल हत्या प्रकरणको प्रतिवेदन सरकारी वकिलको कार्यालयमा बुझाइयो

काठमाडौं महानगरपालिका–३२ तीनकुनेस्थित गैह्रीगाउँमा रहेको दिव्य समिलमा चार जनाको हत्या प्रकरणको अनुसन्धान प्रतिवेदन प्रहरीले जिल्ला सरकारी वकिलको कार्यालयमा बुझाएको छ । गत भदौ २९ गते राति व्यक्तिगत प्रतिशोधका कारण हत्या भएको भनिएको प्रकरणमा प्रहरीले विविध प्रविधिको परीक्षण गरेर प्रतिवेदन बुझाएको हो । प्रहरीले हत्या आरोपमा सञ्जय भण्डारीलाई पक्राउ गरेको छ । उनी फरक क्षमताका बोल्न नसक्ने भएकाले प्रहरीले दोभासेमार्फत बयान लिएको थियो । बयानका क्रममा सञ्जयले अन्य व्यक्तिको पनि हत्या गरेको स्वीकार गरेका छन । त्यसपछि प्रहरीले अनुसन्धानका क्रममा भण्डारीको दिमागी अवस्था परीक्षण समेत गरेको छ । सरकारी वकिलको कार्यालयले प्रतिवेदन अध्ययन सकिएपछि मुद्दा दर्ता हुने जनाएको छ । प्र्रहरीले आरोपी भण्डारीलाई जन्म कैदको सजाय माग दाबी लिनुपर्ने रायसहितको प्रतिवेदन बुझाएको छ । आरोपीले रिसिइबी साँधेर एक व्यक्तिको हत्या गरेको र उक्त घटना भएको देखेपछि घटना बाहिर जान नदिन एकै परिवारका अन्य तीनको पनि हत्या गरेको पाइएको प्रहरीको भनाइ छ । भदौ २९ गते समिलमा कुमार भन्ने पूर्णबहादुर भुजेल, उनकी श्रीमती अम्बिका भुजेल, कुमारकी आमा शुभद्रा भुजेल र मोरङ बेलवारी स्थायी घर भएका नवीन भन्ने विशाल राईको हत्या भएको थियो ।