औपचारिक भ्रमणका लागि प्रधान सेनापति शर्मा बेलायत प्रस्थान

प्रधान सेनापति प्रभुराम शर्मा आज बेलायतको औपचारिक भ्रमणका लागि प्रस्थान गरेका छन् । बेलायती सेनाका जनरल सर प्याट्रिक स्याण्डर्सको निमन्त्रणामा उनी बेलायतको छ दिवसीय औपचारिक भ्रमणका लागि प्रस्थान गरेका हुन् । भ्रमणका क्रममा प्रधान सेनापति शर्माले त्यहाँका समकक्षीसँग भेटवार्ता गर्नेछन् । प्रधानसेनापति शर्माले त्यहाँको रोयल कलेज अफ डिफेन्स स्टडिज् र रोयल मिलिटरी एकेडेमी स्याण्डहर्स्टको भ्रमण पनि गर्नेछन् । ती दुवै शिक्षण संस्थामा नेपाली सेनाका अधिकृत लामो समयदेखि सहभागी हुँदै आएका छन् । प्रधानसेनापति शर्माले बेलायती गोर्खा सैनिकको मुख्यालयको पनि भ्रमण गर्नेछन् । प्रधानसेनापति बेलायतमा रहँदा क्याम्ब्रीयन पेट्रोलमा सहभागी टोलीसँग पनि भेटघाट हुनेछ ।