सडक बत्तीको विद्युत् महशुल भुक्तानी गर्न स्थानीय निकायहरुलाई  प्राधिकरणको आग्रह

नेपाल विद्युत् प्राधिकरणले सडक बत्तीको विद्युत् महशुल भुक्तानी गर्न स्थानीय निकायहरुलाई आग्रह गरेको छ । प्राधिकरणले आज सूचना जारी गर्दै सडक बत्तीको महशुल ४५ दिन भित्रमा भुक्तानी गर्न स्थानीय तहहरुलाई आग्रह गरेको हो । सडक बत्ती प्रयोग गरेवापत गएको असार मसान्तसम्मको महशुल नबुझाए कारबही गर्ने चेतावनीसमेत प्राधिकरणले दिएको छ । त्यसैगरी स्थानीय तहहरुलाई मिटर नराखी आफूखुसी जथाभावी सडक बत्ती जडान नगर्न पनि प्राधिकरणले आग्रह गरेको छ । सडक बत्ती प्रयोग गरेवापत काठमाडौं महानगरपालिकासहित ३ सय ३२ स्थानीय तहले प्राधिकरणलाई भुक्तानी गर्न बाँकी छ ।  असार मसान्तसम्म स्थानीय तहहरुबाट ६ अर्ब  ८ करोड ९४ लाख ३११ रूपैयाँ उठ्न बाँकी रहेको प्राधिकरणले जनाएको छ । काठमाडौं महानगरपालिकाले मात्रै प्राधिकरणलाई १ अर्ब ३१ करोड ६२ लाख ९८ हजार ७७२ रूपैयाँ  बक्यौता तिर्न बाँकी छ ।