एसियाली खेलकुद: नेपाली महिला कबड्डी टोलीलाइ कास्य पदक

नेपाली महिला कबड्डी टोलीले जारी १९ औँ एसियाली खेलकुदमा कास्य पदक जितेको छ । प्रतियोगितामा नेपालको यो पहिलो पदक हो । शुक्रवार भएको खेलमा भारतसँग ६१–१७ ले पराजित भएपछि नेपाल कास्यमा सीमित भएको हो । भारत फाइनल पुगेको छ । यसअघि समूहगत चरणमा एक खेल जितेको भरमा नेपाली टोलीले सेमिफाइनल यात्रा तय गरेर कम्तीमा कास्य पदक पक्का गरेको थियो । कबड्डीमा सेमिफाइनल पुग्ने चारवटै टोलीले पदक प्राप्त गर्ने प्रावधान छ ।  नेपाल समूह ‘बी’को उपविजेताका रूपमा सेमिफाइनल प्रवेश गरेको हो । यस्तै भारत समूह ‘ए’ को विजेता बन्दै सेमिफाइनलमा प्रवेश गरेको हो । महिला कबड्डीतर्फ नेपालले पहिलोपटक एसियाली खेलकुदमा भाग लिएको हो ।