मध्यपश्चिमले जित्यो जय नेपाल कप टि—२० क्रिकेटको उपाधि

काठमाडौं । नेपालको मध्यपश्चिम विश्वविद्यालयले मंगलवार जय नेपाल कप अन्तरविश्वविद्यालय टी ट्वान्टी क्रिकेट प्रतियोगिताको उपाधि जितेको छ । 

त्रिवि क्रिकेट मैदानमा मंगलवार सम्पन्न फाइनलमा भारतको लखउन विश्वविद्यालयलाई ५८ रनले हराउँदै मध्यपश्चिम विश्वविद्यालय च्याम्पियन भएको हो ।

नेपाल विद्यार्थी संघ (नेविसंघ) ले आयोजना गरेको यस प्रतियोगितामा नेपाल, भारत र बंगलादेशका गरी कुल आठ विश्वविद्यालयले प्रतिष्पर्धा गरेका थिए । 

बंगलादेशको एक, भारतको तीन र नेपालका चार विश्विद्यालयलले जय नेपाल कप टी ट्वान्टी प्रतियोगितामा प्रतिष्पर्धा गरेका हुन् । 

फाइनलमा मध्यपश्चिमले भारतीय टोलीमाथि सहज जित निकालेको हो । मध्यपश्चिमले १ सय ७६ रनको लक्ष्य दिएको थियो । जबाफी लक्ष्य पछ््याएको लखनउले निर्धारित ओभरमा ९ विकेटको क्षतिमा १ सय १७ रन मात्र बनाउन सक्यो ।

त्यसअघि टस जितेर पहिले ब्याटिङ गरेको मध्यपश्चिमले निर्धारित ओभरमा ६ विकेट गुमाउँदै १ सय ७५ रन बनाएको थियो ।