भेप सुन तस्करी प्रकरणमा थप एक जना पक्राउ

भेपमार्फत भएको सुन तस्करी प्रकरणमा थप एक जना पक्राउ परेका छन् । तस्करीको आरोप लागेका चिनिया नागरिक दावा जिनका सवारी चालक लोकेन्द्र कुमार पौडेललाई प्रहरीको केन्द्रीय अनुसन्धान ब्युरो सीआईबीले पक्राउ गरेको हो । संयुक्त अरब इमिरेट्स यूएईबाट गत पुसमा इलेक्ट्रिक सिगरेट भेपमा ९ किलो सुन तस्करी भएको थियो ।  चिनियाँ नागरिक जिन वाङले ल्याएको पैठारीको सुन भन्सारले रोकेको थियो । पछि भन्सारकै कर्मचारीले गायब पारेका थिए । सोही प्रकरणमा गत भदौ १३ गते माओवादी केन्द्रका उपाध्यक्ष एवं पूर्वसभामुख कृष्णबहादुर महराका छोरा राहुल महरालाई पक्राउ गरेर सीआईबीले अनुसन्धान गरिरहेको छ । सोही प्रकरणमा सोमबार माओवादी उपाध्यक्ष महरासँग पनि सीआईबीले बयान कागज गराएको छ । फ्लाई दुबईको जहाजमार्फत गत पुस १० गते ९ किलो सुन काठमाडौँ भित्र्याइएको प्रहरीको दाबी छ । सो काण्डमा भन्सारका कर्मचारीसहित ५ जना पुर्पक्षका लागि कारागारमा चलान भएका छन । सुन ल्याउने दावा जिन भने नेपालमा अनुसन्धान सुरु भएपछि चीन भागेका छन ।