धादिङको गजुरीमा ट्रकको ठक्करवाट दुई विद्यार्थीको मृत्यु

पृथ्वी राजमार्गअन्तर्गत धादिङको गजुरीस्थित मजुवामा ट्रकले ठक्कर दिँदा दुई विद्यार्थी बालकको मृत्यु भएको छ । ट्रकको ठक्करबाट सिद्धलेक गाउँपालिका–६ का निर्मल श्रेष्ठ र सञ्जीव श्रेष्ठको घटनास्थलमै मृत्यु भएको हो । उनीहरु दुवै जना बागेश्वरी माध्यामिक विद्यालयको कक्षा आठमा अध्ययनरत थिए । बागेश्वरी मावि मलेखुमा कक्षा ८ को कोचिङ कक्षा पढ्न जाँदै गरेको समयमा उनीहरुलाई ट्रकले ठक्कर दिएको हो । काठमाडौंबाट मुग्लिङतर्फ जाँदै गरेको प्रदेश २–००१ ख ८७१३ नम्बरको ट्रकले ठक्कर दिँदा उनीहरुको घटनास्थलमै मृत्यु भएको हो । ट्रकले सोही दिशातर्फ जाँदै गरेको अर्को ट्रकलाई ओभरटेक गर्ने क्रममा ठक्कर दिएको प्रहरीले जनाएको छ । ट्रक चालक रौतहटको चन्द्रपुर नगरपालिका–२ का ४१ वर्षीय अशोक बम्जनलाई प्रहरीले नियन्त्रणमा लिएको छ । दुर्घटना पछि स्थानीयले पृथ्वी राजमार्ग अवरुद्ध गराएका छन् ।।