सरकारले मुलुकमा संवैधानिक संकट निम्त्याइरहेको छ: ओली

कुनै नियम र कानुन पालना नगरेको दाबी

Avenues

असोज १६, २०८० मंगलबार

प्रमुख प्रतिपक्ष दलका नेता केपी ओलीले पछिल्लो समयमा सरकारहरू स्वेच्छाचारी देखिएको बताएका छन् । प्रतिनिधिसभाको आजको बैठकमा सम्बोधन गर्दै उनले गठबन्धन सरकार अनुत्तरदायि र गैर जिम्मेवार भएको बताएका हुन । पूर्वप्रधानमन्त्री समेत रहेका ओलीले वर्तमान माओवादी–कांग्रेस गठबन्धन सरकारले मुलुकमा संवैधानिक संकट निम्त्याइरहेको आरोप समेत लगाए ।
अध्यक्ष ओलीले सरकारले कुनै नियम र कानुन पालना नगरेको आरोप लगाएका हुन । संविधान स्वीकार्न सबैलाई स्थान र अवसर दिनुपर्नेमा सरकारले संविधान बाहिर धकेल्ने क्रियाकलापलाई प्रोत्साहन दिइरहेको उनले बताए । भ्रष्टाचारका विभिन्न फाइल खोलिरहेको भनेर धम्की दिइरहेको ओलीको गुनासो छ ।
प्रतिपक्षलाई तर्साउनका लागि सरकारले भ्रष्टाचारका फाइल खोल्छु भनेको ओलीको भनाइ थियो । सुन तस्करीमा संलग्नहरूलाई पक्राउ नगरेको भन्दै ओलीले गृहमन्त्री श्रेष्ठमाथि प्रश्न समेत गरे । प्रतिपक्षमाथि सुशासनको अभियान रोक्न लागेको भनेर गृहमन्त्रीले गलत बोलेको उनको भनाइ छ । अध्यक्ष ओलीले संविधान दिवसको अवसर पारेर कैदीलाई दिइएको आम माफीको बिरोध गरे । एसिड आक्रमण गर्नेलाई अदालतले १० वर्ष सजाय तोकेपनि सरकारले छोडेकोप्रति उनले आपत्ति जनाएका हुन् ।