सुन प्रकरणमा चिनियाँसहित तीन जनालाई पक्राउ

Avenues

असोज १६, २०८० मंगलबार

प्रहरीले दोलखा सुन प्रकरणमा एक चिनियाँ नागरिकसहित तीन जनालाई पक्राउ गरेको छ । दोलखामा बरामद ११ किलो सुन प्रकरणमा चिनियाँ नागरिकसहित थप ३ जनालाई मंगलबार स्वयम्भुबाट प्रहरीले पक्राउ गरेको हो । पक्राउ पर्नेमा चिनियाँ नागरिक साथी भनिने गेङ्रु, उनका सहयोगी सनत प्रधान र सुन किनबेचमा संलग्न लालबहादुर तामाङ रहेका छन् । केन्द्रीय अनुसन्धान ब्यूरो ’सीआईबी’ का प्रवक्ता एसपी नवराज अधिकारीका अनुसार पक्राउ गरिएका उनीहरुलाई आज जिल्ला प्रहरी कार्यालय, दोलखालाई बुझाउने छ । । यो गिरोहले दोलखाको नाकाबाट आलुको बोरामा लुकाएर सुन तस्करी गर्ने गरेको थियो । योसँगै यस प्रकरणमा पक्राउ पर्नेको सङ्ख्या १० पुगेको छ । यसअघि प्रहरीले सात जनालाई पक्राउ गरिसकेको छ । पक्राउ पर्नेमा बिगु–१ घर भएका राज तामाङ, २८ वर्षीय केशर तामाङ, २० वर्षीय माधव मगर, १९ वर्षीय पेम्बा तामाङ, ५५ वर्षीय नुर्वु छिरीङ शेर्पा, ३० वर्षीया सुनमाला तामाङ र च्याङ्बा भन्ने चसमान तामाङ छन् । उनीहरूमाथि दोलखामा नै संगठित अपराध अन्तरगत मुद्दा चलिरहेको छ । यो महिना चार दिनको अन्तरालमा दोलखामा तस्करीको ११ किलो सुन बरामद भएको थियो । गत असोज ११ गते दोलखाको सिंगटीबाट ४ किलो सुन बरामद भएको थियो । त्यसको भोलिपल्ट थप ३ किलो सुन फेला परेको थियो । त्यसपछि असोज १४ गते लामाबगरमा थप ४ किलो सुन फेला परेको थियो । पछिल्लो समय त्रिभुवन अन्तराष्ट्रिय विमानस्थलमा चेकजाँचमा कडाइ भएपछि तस्करले दोलखा नाकाबाट सुन तस्कर गर्दै आइरहेका छन् । यसरी आउने सुन बौद्ध, ठमेल लगायतका क्षेत्रमा बिक्री हुने गरेको प्रहरीले जनाएको छ ।