अख्तियारको वार्षिक प्रतिवेदन राष्ट्रपति पौडेल समक्ष पेश

एक वर्षमा २० हजार ९ सय उजुरी, १ सय ६२ वटा मुद्दा दायर

Avenues

असोज १५, २०८० सोमबार

अख्तियार दुरुपयोग अनुसन्धान आयोगले आज राष्ट्रपति रामचन्द्र पौडेलसमक्ष वार्षिक प्रतिवेदन पेश गरेको छ । अख्तियारका प्रमुख आयुक्त प्रेमकुमार राईले आज राष्ट्रपति भवनमा आयोजित एक समारोहका बीच उक्त प्रतिवेदन पेश गरेका हुन् । आयोगले गत आर्थिक वर्षमा १ सय ६२ वटा मुद्दा दायर गरेको प्रतिवेदनमा उल्लेख छ । यसअन्तर्गत ६४ वटा गैरकानुनी लाभ हानी, घुससँग सम्बन्धी ३२ र सार्वजनिक सम्पत्तिको हानी २७, गैरकानुनी सम्पत्ति आर्जनमा १३, शैक्षिक योग्यताको नक्कली प्रमाणपत्रका आठ, राजस्व चुहावटका सात र विविध ११ वटा मुद्दा रहेका छन् । यी मुद्दामा ७ सय ६६ जनालाई प्रतिवादी कायम गरी एक अर्ब ७७ करोड ५८ लाख ४६ हजार ४ सय ३७ रुपैयाँ विगो माग दाबी गरिएको आयोगले जनाएको छ । १ सय ६२ वटा मुद्दामा नेपाल सरकारका विशिष्ट कर्मचारी एकजना, अधिकृत स्तरका कर्मचारी २ सय १४ जना, सहायक तथा सहयोगी १ सय ४४, निर्वाचित तथा मनोनीत २ सय ९ र मतियार तथा विचौलिया १९८ गरी जम्मा ७६६ प्रतिवादी कायम भएका छन । आयोगका अनुसार आर्थिक वर्ष २०७९÷०८० मा आयोगमा विभिन्न माध्यमबाट २० हजार ९ सय पाँच वटा उजुरी परेका छन् । आयोगका अनुसार सबैभन्दा बढी स्थानीय तहका मात्रै ३५.९५ प्रतिशत छन् । आयोगबाट १८ हजार ७९९ अर्थात ६६.९८ प्रतिशत उजुरी प्रारम्भिक छानबिनबाट फर्स्योट गरिएको छ । यीमध्ये एक हजार १ सय ३३ उजुरीउपर विस्तृत अनुसन्धान भइरहेको र सात हजार ८ सय ६९ उजुरी तामेली गरिएको छ । गत आवमा बाँकी ९ हजार २६८ उजुरी नयाँ आवमा सरेर प्रक्रियामा गएको आयोगले जनाएको छ । अनुसन्धान भइरहेकामध्ये ८ सय ७८ उजुरीका सम्बन्धमा आयोगबाट ९ सय ३७ पटक निर्णय भएको र १ सय ६२ वटा मुद्दामा विशेष अदालतमा आरोपपत्र दायर भएको छ । अख्तियारका अनुसार विशेष अदालतमा ७ सय ६६ जनालाई प्रतिवादी बनाएर एक अर्ब ७७ करोड ५८ लाख ४६ हजार ४३७ रुपैयाँ बिगो माग दाबी गरि मुद्दा गत बर्ष दर्ता भएका छन ।