प्रधानमन्त्री दाहाल र एमाले अध्यक्ष ओलीबीच बालुवाटारमा भेटवार्ता

प्रधानमन्त्री पुष्पकमल दाहाल र नेकपा एमालेका अध्यक्ष केपी ओलीबीच आज भेटवार्ता भएको छ । प्रधानमन्त्री निवास बालुवाटारमा दुई नेताविच छलफल भएको हो । भेटवार्तामा उपाध्यक्ष विष्णु पौडेल र संसदीय दलका सचेतक महेश बर्तौला पनि सहभागी थिए । शनिबार मात्रै चीन भ्रमणबाट फर्किएका प्रधानमन्त्री दाहालले आज बिहान प्रमुख प्रतिपक्षी दलका नेतासँग छलफल गरेका हुन । अवैध सुन तस्करी प्रकरणको छानबिनका लागि उच्चस्तरीय समिति गठन गर्ने विषयमा दुई नेताविच सकारात्मक कुराकानी भएको बताइएको छ । यसैविच प्रधानमन्त्री दाहालले संसदमा प्रतिनिधित्व गर्ने सात दलको बैठक बोलाएका छन् । केही बेरमा बस्ने गरी बैठकमा राष्ट्रिय मान्यताप्राप्त दलहरू सहभागी हुनेछन् । सात दलको बैठकमा सदन सञ्चालन, सुन तस्करीको छानबिन लगायतमा छलफल हुने बुझिएको छ ।