एमसीसी प्रमुख एलिस आज काठमाडौं आईपुग्दै

अमेरिकी परियोजना मिलेनियम च्यालेन्ज कर्पोरेसन एमसीसी की प्रमुख कार्यकारी अधिकृत सीईओ एलिस अलब्राइट पाँच दिने नेपाल भ्रमणका क्रममा आज काठमाडौं आउदैछिन । सम्झौतामा छ वर्षपछि भदौ १३ गतेवाट एमसीसी कार्यान्वयनमा आएपछि त्यसवारे बुझ्न उनी नेपाल आउन लागेकी हुन । अलब्राइटले नेपाल–अमेरिका बीचको द्विपक्षीय साझेदारी मनाउन र एमसीसी–नेपाल कम्प्याक्ट सम्झौताको सफल सुरुआतको उपलक्ष्यमा नेपाल भ्रमण गर्न लागेको नेपालस्थित अमेरिकी राजदूतावासले जनाएको छ । भ्रमणका क्रममा एलिसले नेपाल सरकारका वरिष्ठ नेतृत्वकर्ताहरूसँग शिष्टाचार भेट गर्ने र कार्यान्वयनका अगाडिका चुनौतीहरूलाई सम्बोधन गर्न छलफल गर्ने बताइएको छ । यसअघि एमसीसी नेपाल कम्प्याक्ट कार्यान्वयन घोषणाका क्रममा एमसीसीका उपाध्यक्ष क्यामरुन एस अल्फोर्ड पनि काठमाडौं आएका थिए । एमसीसीबाट नेपालले ५ सय मिलियन डलरको सहायता प्राप्त गर्ने हो । यस सहायताबाट नेपालमा विद्युत प्रसारण लाइन निर्माण र सडकहरुको स्तरोन्नति गर्ने योजना छ । आयोजनाको काम घोषणा भएको मितिवाट पाँच वर्षभित्रमा सम्पन्न गरिसक्नु पर्नेछ ।