महिला लिग फुटबलमा आज नेपाल पुलिस र त्रिभुवन आर्मी भिड्दै

काठमाडौं । एन्फा राष्ट्रिय महिला लिग फुटबल अन्तर्गत सुपर स्टेजको दोस्रो चरणमा आज (बिहीबार) नेपाल पुलिस क्लबले त्रिभुवन आर्मी क्लबको सामना गर्दैछ । 

अखिल नेपाल फुटबल संघ (एन्फ) मुख्यालय मैदानमा हुने खेल दिउँसो ३ बजे हुनेछ । लिगमा पुलिस र आर्मी तेस्रो पटक एक अर्का सँग प्रतिस्पर्धा गर्दैछन् । यी दुई बीचको पछिल्लो दुई भेट बराबरीमा टुंगिएको थियो । 

सुपर स्टेजमा चार टोली प्लेअफमा पुग्ने समीकरण छ । एपिएफले शीर्ष स्थानमा आफ्नो पकडलाई बलियो बनाएको छ । पुलिस र आर्मी दुबैको पाँच खेल बाट समान १० अंक छ । तर, गोल अन्तरका आधारमा आर्मी पुलिस भन्दा ११ गोलले अगाडि छ । 

दोस्रो स्थानमा रहेर प्लेअफ समीकरणमा स्थान बनाउने हो भने पुलिसलाई आज जित्नै पर्ने दबाब छ । आर्मीलाई बराबरीको नतिजा पर्याप्त बन्नेछ ।