चीन भ्रमणमा रहेका प्रधानमन्त्री दाहाल तिब्बतको ल्हासामा

प्रधानमन्त्री पुष्पकमल दाहाल चीनको स्वशासित क्षेत्र तिब्बतको ल्हासा पुगेका छन् । गत शनिबारदेखि चीनको औपचारिक भ्रमणमा रहेका प्रधानमन्त्री दाहाल आज चीनको छिङछोङ सहरबाट ल्हासा पुगेका हुन् । प्रधानमन्त्री दाहाल ल्हासास्थित नेपाल महावाणिज्यदूतको कार्यालयमा आज दिउँसो आयोजना हुने अन्तरक्रिया कार्यक्रममा सहभागी हुनेछन् । दाहालले आजै तिब्बतको पोताला दरबार र जोखाङ मन्दिरको भ्रमण गर्ने कार्यक्रम रहेको छ । उनले आजै चिनियाँ कम्युनिष्ट पार्टीको सिचाङ स्वशासित क्षेत्रका सचिव वाङ जुनचेङसँग द्विपक्षीय भेटवार्ता गर्नेछन् । प्रधानमन्त्री दाहाल आज ल्हासामा नै बस्ने कार्यक्रम छ । तिब्बतमा रहँदा प्रधानमन्त्रीले कैलाश मानसरोवर एवं कैलाश पर्वतको भ्रमण समेत गर्ने कार्यक्रम छ । उनको साथमा परराष्ट्रमन्त्री नारायणप्रकाश साउद, खानेपानीमन्त्री महिन्द्र राय यादव, भौतिक पूर्वाधार एवं यातायातमन्त्री प्रकाश ज्वालासहित भ्रमण दलका सदस्यहरू पनि तिब्बत पुग्दैछन् । यसअघि प्रधानमन्त्री दाहाल हिजो बेइजिङबाट छिङछोङ सहर आइपुगेका थिए । त्यहाँ उनले चिनियाँ कम्युनिष्ट पार्टीका केन्द्रीय सदस्यसँग भेटवार्ता गर्नुका साथै कृषि क्षेत्रमा छिङछोङ महानगरले गरेका कार्यहरुबारे जानकारी लिएका थिए ।