प्रधानमन्त्री दाहाल र चिनियाँ समकक्षी लि छ्याङबीच भेटवार्ता

Avenues

असोज ८, २०८० सोमबार

प्रधानमन्त्री पुष्पकमल दाहाल र चिनियाँ समकक्षी प्रधानमन्त्री लि छ्याङबीच भेटवार्ता भएको छ । आज बिहान दाहाल र लि छ्याङबीच बेइजिङस्थित ग्रेट हल अफ त पिपुलमा भेटवार्ता भएको हो । भेटमा छ्याङले चीन–नेपालबीचको सम्बन्धमा नयाँ ऊर्जा थपिएको चीनले महसुस गरेको बताएका छन् । उनले नेपालका प्रधानमन्त्री दाहालको यस भ्रमण द्विपक्षीय सम्बन्धको विस्तार र सुदृढीकरण गर्न थप सहयोग बनेको उल्लेख गरे । चिनियाँ राष्ट्रपति सि जिनपिङसँगको भेटमा भएका कुराकानीबाट दुई देशको सम्बन्धका विविध आयाममा छलफल हुनु सुखद् रहेको प्रधानमन्त्री छ्याङले बताए । उनले प्रधानमन्त्री दाहालले चीन–नेपाल सम्बन्धलाई थप सुमधुर बनाउन योगदान पु¥याउनुभएको उल्लेख गरे । प्रधानमन्त्री छ्याङले नेपालको सदियौं पुरानो एक छिमेकी रहेको चीनले सदैव नेपालको विकास, समृद्धि र हित चाहेको धारणा राखेका छन । यसअघि प्रधानमन्त्री दाहाललाई चिनियाँ प्रधानमन्त्री लिले ग्रेट हल अफ दि पिपलमा स्वागत गरेका थिए । दुई प्रधानमन्त्रीबीचको भेटअघि दाहाललाई चिनियाँ सेनाले विशेष सम्मान ‘गार्ड अफ अनर’ प्रदान गरेको थियो । भेटपछि भएको दुईपक्षीय वार्तामा नेपाल र मित्र राष्ट्र चीनबीच १३ बुँदे सम्झौता भएको छ । प्रधानमन्त्री दाहाल र चिनियाँ समकक्षी छ्याङको उपस्थितिमा १३ बुँदे सम्झौतामा हस्ताक्षर भएको हो । विद्युत्, सडक पूर्वाधार, कृषि लगायतका १३ वटा विषयमा नेपाल र चीनबीच सम्झौता भएको प्रधानमन्त्री दाहालको सचिवालयले जनाएको छ । सम्झौताको औपचारिक जानकारी संयुक्त प्रेस विज्ञप्तिमार्फत गराइने बतार्ईको छ । यसअघि प्रधानमन्त्री दाहाल र चिनियाँ जनकंग्रेसका अध्यक्ष झाओ लेजीबीच भेटवार्ता भएको भएको थियो । प्रधानमन्त्री दाहाल बुधबार चीनको छोङछिङ्ग महानगरपालिकामा चीनले कृषि र औद्योगिक क्षेत्रमा गरेको विकासको अवलोकन गर्ने कार्यक्रम छ । प्रधानमन्त्री दाहाल चीनको तिब्बत स्वशासित क्षेत्रको भ्रमणमा पनि जाने कार्यक्रम छ । तिब्बतमा रहँदा उनले त्यहाँका उच्चपदस्थ अधिकारीसँग भेटवार्ता गर्ने कार्यक्रम छ । प्रधानमन्त्री दाहाल आफ्नो प्रतिनिधिमण्डलसहित यही असोज १३ गते नेपाल फर्कने कार्य तालिका रहेको छ । उनी साताव्यापी भ्रमणका लागि चीन पुगेका हुन ।