रवि लामिछाने काठमाडौं अदालतमा उपस्थित

काठमाडौं । राष्ट्रिय स्वतन्त्र पार्टी (रा.स्व.पा.) का सभापति रवि लामिछाने आज जिल्ला अदालत काठमाडौंमा उपस्थित भएका छन् । 
 
काठमाडौंको कालिमाटी स्थित स्वर्णलक्ष्मी सहकारी ठगी अभियोगमा मुद्दा परेकाले उनी जिल्ला अदालतमा हाजिर भएका हुन् । 

जिल्ला प्रहरी परिसर, काठमाडौंले गत पुस २१ गते लामिछाने सहित ३९ जनालाई प्रतिवादी बनाउँदै मुद्दा दर्ता गर्न सुझाव दिएपछि उनी अदालतमा हाजिर भएका  हुन् । सो सहकारी बाट ६ सय ९० बचत कर्ताको १ अर्ब १९ करोड ३० लाख ९० हजार ४९३ रुपैयाँ हिनामिना गरेको आरोप छ । 

पोखराको सूर्यदर्शन सहकारी ठगी मुद्दामा यही पुस २५ गते मात्र धरौटीमा रिहा भएका पूर्व गृह मन्त्री लामिछाने पुस २६ गते साँझ काठमाडौं आइपुगेका थिए । लामिछाने विरुद्ध रुपन्देहीको सुप्रिम सहकारी, चितवनको सहारा चितवन र पर्साको सानो पाइला सहकारी ठगीको पनि आरोप लागेको छ ।

ती जिल्लामा पनि उनी विरुद्ध मुद्दा दर्ताको प्रकिया चलिरहेको छ ।