काठेखोलामा ५ करोड ४० लाखको सुन्तला उत्पादन

फाइल तस्बिर

बागलुङ । काठेखोला गाउँपालिका–६ का किसानले गत वर्षको तुलनामा यस वर्ष ५ करोड ४० लाखको सुन्तला बिक्री गरेका छन् । 

गाउँपालिकाका कृषि प्राविधिक अग्नि कँडेलका अनुसार यो गत वर्षको तुलनामा करिब २ करोडले बढी हो । गत वर्ष यहाँका किसानले ३ करोड ५० लाख बराबरको सुन्तला बिक्री गरेको उनको भनाइ छ । 

यस वडामा मात्रै झण्डै ३० हेक्टर क्षेत्रफलमा सुन्तलाखेती भइरहेको उनले जानकारी दिए । कँडेलले यस वर्ष ९ सय मेट्रिक टन सुन्तला उत्पादन भएको बकताउछन्  । सुन्तलामा कुनै पनि रोग नलाग्दा राम्रो उत्पादन बढेको र पालिकाले किसानलाई प्रोत्साहन गर्न प्राविधिक सहयोग र तालिम समेत दिँदै आएको उनको भनाइ छ । 

उनले भने, “काठेखोला–६ मा सुन्तला उत्पादन राम्रो छ, वडा–४ र ७ को केही क्षेत्रमा पनि सुन्तलाखेती भइरहेको छ, किसानलाई प्रोत्साहनका लागि समय–समयमा तालिम दिने गरेका छौँ, ढुसीजन्य रोग बाट बचाउन नीलोतुथो देखि प्राविधिक सहयोग पनि उपलब्ध गराउँदै आएका छौँ ।” उनले यस वर्ष पनि  सुन्तलाखेतीको क्षेत्र विस्तार गर्ने कार्यक्रम रहेको बताए । 

गाउँपालिकाले गत वर्ष किसानलाई ५ हजार ५ सय सुन्तलाका विरुवा र ३ हजार कागतीका बिरुवा वितरण गरेको थियो । काठेखोला–६ का किसान लोकनाथ कँडेलले यस वर्ष १२ लाख ५० हजारको सुन्तला बेचिसकेको जानकारी दिँदै १ लाखको बिक्री गर्न बाँकी रहेको बताए ।  । आफ्नो बगैँचामा ३ सय बोट सुन्तला रहेको र यस वर्ष २ सय १० बोटले फल दिएको उनको भनाइ छ । 

“हरेक वर्ष सुन्तला उत्पादन बढ्दै गएको छ, नयाँ बोटले पनि फल दिन थालेका छन्, किसानले सुन्तला बगैँचा व्यवस्थापनमा पनि ध्यान दिन थाले पछि राम्रो फल्न थालेको छ”, कँडेलले भने, “मेरो बगैँचामा नयाँ ९० बोट सुन्तला छन्, अर्को वर्ष देखि फल दिन्छन्, सुन्तलाखेती बाट आम्दानी राम्रो छ, पहिले कोदो मकै फल्ने ठाउँमा अहिले सुन्तला फलाउँछौँ ।”

किसान देवीलाल कँडेलले अघिल्लो वर्ष ३ लाखको सुन्तला बिक्री गरेको उल्लेख गर्दै अहिले ३ लाख भन्दा बढीमा बिक्री भएको बताए । व्यापारी बगैँचामै आएर सुन्तला खरिद गर्ने भएकाले बजारीकरणको समस्या नभएको उनको भनाइ छ । 
रासस