मोरङमा जंगली हात्तीले भत्कायो ३ वटा घर

विराटनगर । मोरङको सुन्दरहरैंचा नगरपालिका–१० बागझोडामा जंगली हात्तीले तीन वटा घर भत्काएको छ । बुधबार बिहान करिब ४ बजे जंगलबाट बागझोडाको बस्ती पसेको एउटा जंगली हात्तीले तीन घरमा क्षति पुर्‍याएको हो ।

एउटा घरमा घरको टाटीबेरा भत्काएर १५ मन बराबर धानमा क्षति पुर्‍याएको बताउँदै प्रहरीले भन्यो, ‘घरमा खानका लागि राखेको धान टाटी भत्काएर हात्तिले खाएको र नखाएको धान वरपर छरेको थियो ।’

सोही स्थानकै अर्को घरको उत्तर पट्टीको गारो हात्तीले भत्काइदिएको र कोठाभित्र रहेको दराज, पलङमासमेत क्षति पुगेको प्रहरीको भनाइ छ ।

सोही स्थानकै अर्को घरमा कच्ची बेरा पनि हात्तीले भत्काइदिएको हो । बिहान बस्ती पसेको हात्तीले तीन वटा घरमा क्षति पुर्‍याएपछि पुन जंगल पसेको प्रहरीले बताएको छ ।