मूर्ति सेलाउँदा विवाद बढेपछि मलंगवामा अनिश्चितकालिन कर्फ्यु

जिल्ला प्रशासन कार्यालय सर्लाहीले मलंगवा नगर क्षेत्रमा कर्फ्यु आदेश जारी गरेको छ । गएराति मूर्ति सेलाउने क्रममा भएको विवादलाई मध्यनजर गरी  प्रशासनले कर्फ्यु जारी गरेको हो । मलंगवा नगर क्षेत्रमा भएको सार्वजनिक सम्पत्तिको तोडफोड, आगजनी, ढुङ्गामुढा प्रहार, उच्छृङ्खल गतिविधि लगायत विरोध प्रदर्शनका कारण सर्वसाधारणको सुरक्षामा पर्न सक्ने जोखिमलाई मध्यनजर गरी कर्फ्यु आदेश जारी गरिएको जिल्ला प्रशासनले जनाएको छ । मलंगवा नगरक्षेत्र पूर्वमा झिम नदी, पश्चिममा मुसैली नहर, दक्षिणमा नेपाल भारत सीमा क्षेत्र र उत्तरमा प्रहरी पोष्टरबाबा पेट्रोल पम्प सीमा क्षेत्रभित्र कसैले आवतजावत गर्न नपाइने प्रशासनको सूचनामा उल्लेख छ । त्यस्तै सो क्षेत्रमा भेला हुन नपाइने, बाहिर हिँडडुल गर्न एवम् अरु कुनै प्रकारको उच्छृङल गतिविधि गर्न नपाउने गरी गएराति १० बजेदेखि अर्को आदेश वा व्यवस्था नहुन्जेलसम्मका लागि कर्फ्यु आदेश जारी गरिएको जिल्ला प्रशासन कार्यालयले जनाएको छ । गएराति भएको झडपमा परि प्रहरीसहित केही घाइते भएका छन् । घाइतेहरुको प्रादेशिक अस्पताल मलङ्गवामा उपचार भइरहेको छ । गणेशको मूर्ति विसर्जन गर्न गएकालाई अर्को समूहले ढुङ्गामुढा गरेपछि स्थितिलाई नियन्त्रणमा लिन प्रहरीले केही सेल अश्रुग्यास प्रहार गरेको थियो । अहिले मलङ्गवामा ठूलो सङ्ख्यामा सुरक्षाकर्मी परिचालन गरिएको छ । यसअघि गएको भदौ २२ गते पनि कृष्णको मूर्ति विसर्जन गर्ने क्रममा यही क्षेत्रमा झडप भएको थियो । झडपपछि जिल्ला प्रशासन कार्यालय सर्लाहीले २३ गते बेलुका ५ बजेदेखि २४ गते बिहान ८ बजेसम्म कर्फ्यु लगाएको थियो ।