रत्नपार्कदेखि सूर्यविनायकसम्म २५ वटा द्रुत बस चल्न थाले

काठमाडौँको रत्नपार्कदेखि भक्तपुरको सूर्यविनायकसम्म आजदेखि २५ वटा द्रुत बस चल्न थालेका छन् । अहिलेलाई पिक आवर बिहान ९ बजेदेखि ११ बजेसम्म र बेलुका ४ बजेदेखि ६ बजेसम्म द्रुत बस सञ्चालनमा ल्याइएको हो । हिजो दुई वटा बस सञ्चालन गरिएकोमा आजदेखि २५ वटा बसले नियमित सेवा दिन थालेका हुन । नेपाल  यातायात  व्यवसायी  राष्ट्रिय  महासंघको  सहकार्यमा  विभागले  २५  वटा ठूला बसको व्यवस्थापन गरेको छ । द्रुत बस सञ्चालन हुने रत्नपार्कदेखि भक्तपुरको सूर्यविनायकसम्म सडकमा रातो रङले ‘डेडिकेटेड लेन’ नै छुट्याइएको छ । द्रुत बस सञ्चालन हुने समयमा अत्यावश्यक बाहेकका गाडी यो लेनमा प्रवेश गर्न नपाउने व्यवस्था छ ।  तर एम्बुलेन्स, शववाहन, दमकल, कर्मचारी बोक्ने बस भने यो लेनमा चलाउन पाइनेछ । विभागका अनुसार रातो बत्ती बलेका बेलामा  पनि द्रुत बस  रोकिने छैनन् । त्यस्ता बस एम्बुलेन्स तथा अत्यावश्यक गाडी जस्तै गुड्ने छन् । सूर्यविनायकदेखि रत्नपार्क ४५ मिनेटमा नै पुग्न सकिनेछ । द्रुत बसका लागि रत्नपार्कदेखि सूर्यविनायकसम्म १९ ठाउँमा स्टप तोकिएको छ । रत्नपार्क, भद्रकाली, माइतीघर, बबरमहल, नयाँ बानेश्वर, शान्तिनगर, कोटेश्वर  जडीबुटी, कौशलटार, गट्ठाघर र सूर्यविनायकलगायत यात्रुको चाप हुने ठाउँमा बसस्टप तोकिएको छ । यसबाट सार्वजनिक गाडीको प्रयोगमा प्रोत्साहन हुने र निजी गाडी प्रयोगको संख्या घट्ने विभागको अपेक्षा छ ।।