‘नेपाली कांग्रेसले आउने चुनाव एक्लै लड्छ’

महोत्तरी । नेपाली कांग्रेसका नेता एवं उपप्रधानमन्त्री प्रकाशमान सिंहले कांग्रेसले आगामी चुनाव एक्लै लड्ने बताएका छन् । 

नेपाली कांग्रेस महोत्तरी जिल्ला समितिले  बर्दीबासमा आज शनिबार आयोजना गरेको कार्यकर्ता भेटघाट कार्यक्रमलाई सम्बोधन गर्दै उपप्रधानमन्त्री सिंहले  त्यसका लागि संगठन निर्माणमा लाग्न पार्टीका नेता तथा कार्यकर्तालाई आग्रह पनि गरेका छन् । केही समय अघि भएको उपनिर्वाचनमा यसको अभ्यास भइसकेको पनि सिंहले बताए ।  

महासमिति बैठकले एक्लै चुनाव लड्ने निर्णय गरेको र केन्द्रीय समिति बैठकले त्यसलाई अनुमोदन गरिसकेको पनि उपप्रधानमन्त्री सिंहको भनाई थियो  । कांग्रेसका पूर्व महामन्त्री समेत रहेका सिंहले समाजसेवाको सबै भन्दा  राम्रो माध्यम राजनीति भएको भन्दै  सेवा भावले सक्रिय हुनुपर्नेमा जोड दिए ।

शहरी विकास मन्त्रीसमेत रहेका सिंहले शहरी विकास मन्त्रालयबाट गर्नुपर्ने काम प्रभावकारी रूपमा अघि बढाइरहेको दाबी पनि गरेका छन् ।  सर्लाहीको हरिपुर नगरपालिकामा शहरी विकास मन्त्रालयले बनाएको  व्यवसायिक भवनको उद्घाटनमा जाने क्रममा महोत्तरीमा पार्टीले आयोजना गरेको कार्यक्रममा सिंह सहभागी भएका हुन् ।