भ्रष्टाचार विरुद्ध सबै एक हुनुपर्छ : अध्यक्ष दाहाल

काठमाडौं । नेकपा माओवादी केन्द्रका अध्यक्ष पुष्पकमल दाहालले भ्रष्टाचार विरुद्ध सबै एक हुनुपर्ने बताएका छन् । 

नेपाल पत्रकार महासंघ काठमाडौं शाखाको नवनिर्वाचित कार्यसमितिको पद हस्तान्तरण कार्यक्रमलाई सम्बोधन गर्दै उनले भ्रष्टाचार नियन्त्रणका लागि राष्ट्रिय एकता आवश्यक रहेको बताएका हुन् । अध्यक्ष दाहालले सुशासनको पक्षमा इमानदारिताका साथ भ्रष्टाचार विरुद्ध जसरी जानुपर्ने हो त्यसरी जान नसकेको स्वीकार समेत गरे । 
 
अध्यक्ष दाहालले सुशासन, सामाजिक न्याय र आर्थिक समृद्धिको पक्षमा एक भई जानुपर्ने र एकले अर्कोलाई दोषारोपण गरेर नहुने  बताए । आफू भावुक प्रकृतिको भएकाले कहिले काहीँ आफूले बोलेका शब्द तल माथि पर्नसक्ने उनको भनाइ थियो । 

यस्तै, नेपाली कांग्रेसका नेता अर्जुन नरसिंह केसीले माओवादी अध्यक्ष पुष्पकमल दाहाल प्रति लक्षित गर्दै ओठे भक्तिको प्रदर्शनले देश नबन्ने बताए । नेता केसीले भ्रष्टाचारको छानविन गर्न नेपाली जनताले चिनेको निष्पक्ष ढंग बाट न्याय दिन सक्ने पूर्वप्रधानन्यायाधीशको संयोजकत्वमा शक्ति सम्पन्न समिति गठनको प्रस्ताव समेत गरे । 

यसैगरी नेकपा एमालेका प्रमुख सचेतक महेश बर्तौलाले समाजलाई विभाजित हुने किसिमका अभिव्यक्तिहरु राजनीतिक नेतृत्वले दिनु नहुने बताए । प्रमुख सचेतक बर्तौलाले नेताहरुको अभिव्यक्ति, व्यवहार र कार्यशैली समाजलाई विभाजित गर्ने परिस्थिति तर्फ उन्मुख भएको समेत उल्लेख गरे ।  उनले माओवादी केन्द्रका अध्यक्ष दाहाल प्रति लक्षित गर्दै भविष्यमा कतै भेटै नहुने गरी अभिव्यक्ति नदिन आग्रह समेत गरे ।