बझाङमा जीप दुर्घटना हुँदा एकै परिवारका ३ सहित ४ जनाको मृत्यु

बझाङ । बझाङमा जीप दुर्घटना हुँदा एकै परिवारका ३ सहित ४ जनाको मृत्यु भएको छ । 

बिहीबार राति तलकोट गाउँपालिका बाट सदरमुकाम चैनपुर जाने क्रममा धमेना नजिकै से १ ज ८४३ नम्बरको जीप दुर्घटना हुँदा ४ जनाको मृत्यु भएको बझाङ प्रहरीले जनाएको छ । प्रहरीका अनुसार ३ जनाको घटनास्थलमा र १ जनाको उपचारका लागि अस्पताल लैजाँदै गर्दा ज्यान गएको हो । 

जीप चालक केदारस्यूँ गाउँपालिका–१ रायलका अन्दाजी ३३ वर्षीय शमशेर मल्ल, तलकोट गाउँपालिका–४ की ७२ वर्षीया जौमतीदेवी धामी र उनका छोरा ३६ वर्षीय बम्मबहादुर धामीको घटनास्थलमा नै मृत्यु भएको हो । 

धामीकै नातिनी छ वर्षीया आकृतिको जिल्ला अस्पताल बझाङ लैजाने क्रममा बाटोमा ज्यान गएको प्रहरीले जनाएको छ ।