पठनपाठन बन्द गरेर बुधबारदेखि आन्दोलन गर्ने शिक्षकको तयारी

देशभरका शिक्षकले विद्यालयमा पठनपाठन बन्द गरेर बुधबारदेखि आन्दोलनको तयारी गरेका छन् । सङ्घीय संसदमा दर्ता भएको विद्यालय शिक्षासम्बन्धी कानुनलाई संशोधन र एकीकरण गर्न बनेको विधेयक २०८० को विरोधमा देशभरका १ लाख जना शिक्षक भोलि काठमाडौं आएर आन्दोलन गर्ने शिक्षक महासंघले चेतावनी दिएको हो । विधेयकमा शिक्षकलाई पालिका तहमा राख्ने विषयमा उनीहरुको सबैभन्दा ठूलो विरोध रहेको छ । विधेयक शिक्षकहरूको हकहित विपरीत भएको भन्दै महासङ्घले आन्दोलनको घोषणा गरेको हो । यसैबीच, शिक्षा विज्ञान तथा प्रविधि मन्त्रालयले विद्यालय बन्द र आन्दोलनका कार्यक्रम स्थगित गरेर वार्तामा आउन शिक्षकहरूलाई आग्रह गरेको छ ।मन्त्रालयका सहसचिव भगवान् अर्यालले विज्ञप्ति निकालेर  आज मङ्गलवार दिउँसो ३ बजे मन्त्रालयमा हुने वार्तामा आउन शिक्षकहरूलाई आग्रह गरेका हुन् । विधेयकलाई अन्तिम रुप दिनुअघि विभिन्न चरणमा छलफल भएको र महासंघले पेस गरेका विद्यालय शिक्षक तथा कर्मचारीको पेसागत हकहितसँग सम्बन्धित सुझावहरूलाई यथाशक्य विधेयकमा समावेश गरिएको विज्ञप्तिमा उल्लेख छ । तर शिक्षकहरु भने वार्तामा नबस्ने र भोली प्रदर्शन गर्ने अडानमा छन ।