न्यायाधीस विदामा बसेकाले सन्दीपविरुद्ध मुद्दाको सुनुवाइ स्थगित

क्रिकेटर सन्दीप लामिछानेविरुद्धको मुद्दाको सुनुवाइ आज पनि स्थगित भएको छ । नाबालिका बलात्कारको आरोप लागेका लामिछानेविरुद्धको मुद्दाको सुनुवाइ आज पनि स्थगित भएको हो । सन्दीपको मुद्दा केशव घिमिरेको इजलासमा तय भएपनि उनी बिदामा भएका कारण आजको सुनुवाइ स्थगित भएको बताइएको छ । जिल्ला अदालत काठमाण्डुका केही न्यायाधीश बढुवा भएर जान लागेको, केहीको सरुवा भएको र केही तीजको कारण विदामा रहेकाले सुनुवाइ स्थगित भएको जनाइएको छ । अर्को सुनुवाईको मिति तोकिएको छैन । यसअघि पटकपटक पेसी चढेर पनि अन्तिम बहस हुन नसक्दा मुद्दाले किनारा पाउन सकेको छैन । यसअघि गत २१ भदौमा पछिल्लो पटक सन्दीपको पेसी रहेको थियो । सो दिन न्यायाधीश शकुन्तला कार्कीको इजलासमा वादीपक्षले दिनभर बहस गरेपछि उनले बसाइँसराइको कागजको ढड्डा झिकाउन आदेश दिएकी थिइन् । सो आदेश अनुसारको ढड्डा अदालतमा आइसकेको छ । सन्दीपको मुद्दालाई चाँडो किनारा लगाउन सर्वोच्चले १५ फागुनमा नै निर्देशात्मक आदेश गरेको थियो । तर न्यायाधीशहरूले पुरानै कागजात प्रमाणीकरणमा निरन्तर अन्तिम सुनुवाइ टार्दै आएको भन्दै प्रश्न समेत उठदै आएको छ । काठमाडौं जिल्ला अदालतलाई शीघ्र सुनुवाइ तथा निरन्तर सुनुवाइ का प्रक्रिया अवलम्बन गरी छिटो कारबाही किनारा गर्नू भनी आदेश दिएको पाँच महिना बितिसक्दा पनि मुद्दाले किनारा पाउन सकेको छैन ।।