जनताको समस्या प्रगतिको भोक हो, कांग्रेसले समाधान गर्छ : महामन्त्री थापा

काठमाडौं । नेपाली कांग्रेसका महामन्त्री गगन कुमार थापाले जनताहरुसँग समस्या भएको र त्यसको समाधान कांग्रेसले गर्ने बताएका छन् ।

मंगलबार मकवानपुरमा आयोजित एक कार्यक्रममा बोल्दै महामन्त्री थापाले नेपाली जनतामा प्रगतिको भोक रहेकाले त्यसलाई आफूले सम्बोधन गर्ने बताएका हुन् ।

‘आजको दिनको नेपाली समाजको सबैभन्दा ठूलो समस्या भनेको प्रगतिको भोक छ, त्यसमा हामीले सोच्नुपर्नेछ,’ उनले भने, ‘जनता छन्, उनीहरूसँग समस्या छन्, त्यसको समाधान कांग्रेसले पूरा गरिदियोस् भन्ने छ । पुराना कुरामा अड्किएर बस्ने होइन । नेपाली समाज उकुसमुकुस छ । त्यसलाई हामीले सम्बोधन गर्नुपर्ने छ ।’

साथै, उनले ती समस्याहरूको समाधानको प्रयास गर्दागर्दै हुने सामुहिकताको भावना नै राष्ट्रियता भएको जिकिर गरे ।

‘माटो छ, भूगोल छ, मेची महाकालीको नक्सा छ । त्यो नक्साभित्र हामी बसेका छौं । कुनैबेला समस्या के थियो, हिंसा थियो । कुनैबेला हाम्रो अधिकार थियो,’ थापाले भने, ‘...आजकहिँ न कहिँ छटपटी देखिन्छ । हामीबाट पार्टीभित्र सघन छलफल गरेर अघि बढ्नुपर्छ ।’