युवाको ज्ञान र सीप विना देश विकास नहुने प्रधानमन्त्री दाहालको भनाइ, युवालाई देशभित्रै आशा र भरोसा जगाउने प्रतिवद्धता

काठमाडौ । प्रधानमन्त्री पुष्पकमल दाहालले युवालाई देशभित्रै आशा, भरोसा र सपना जागृत गराउनुपर्ने जिम्मेवारी सरकारलाई रहेको बताएका छन् । शनिवार काठमाडौंमा आयोजित एक कार्यक्रमलाई सम्बोधन गर्दै प्रधानमन्त्री दाहालले युवामा रहेको ज्ञान, सीप, दक्षता, क्षमता र अनुभवलाई सदुपयोग गर्दै राष्ट्र निर्माणमा जुटाउने जिम्मेवारी सरकारको काँधमा रहेको बताएका हुन् । उनले दिगो विकास लक्ष्य, योजना आयोगको प्रतिवेदन राष्ट्रिय युवा नीति र सरकारले निर्दिष्ट गरेको योजना र कार्यक्रमलाई समयानुकुल बनाउँदै नेपाली युवालाई वर्तमानको हिस्सेदार बनाउने कुरामा सरकार सम्पूर्ण रुपले प्रतिवद्ध रहेको पनि उल्लेख गरे । विदेशमा रहेका लाखौँ नेपाली युवाहरुको भविष्यबारे नसोचिकन देशको परिवर्तन, विकास र रुपान्तरण सम्भव नरहेको उनको भनाइ छ । 
प्रधानमन्त्री दाहालले राष्ट्रसंघीय महासभामा आफूले अति कम विकसित देशको मुद्दा र समस्याका साथै जलवायु परिवर्तनबाट नेपाल जस्ता देशलाई परेको असरका बारेमा सम्बोधन गर्ने पनि बताए । नेपालको शान्ति प्रक्रियाका बारेमा पनि सभामा सम्बोधन गर्ने उनको भनाइ छ । आफ्नो चीन भ्रमणका क्रममा नेपाल र चीनबीचको दिव्पक्षी सम्बन्ध बिस्तार, नयाँ नाका खोल्ने तथा कृषि, शिक्षा र स्वास्थ्यका साथै कृषिमा आधारित उद्योग खोल्ने कुरालाई विशेष प्राथमिकतामा राख्ने पनि बताए ।