टाइम पत्रिकाद्वारा विश्वका उदीयमान सय नेताको सूची सार्वजनिक, काठमाडौं महानगर प्रमुख बालेन पनि सूचीमा समेटिए

काठमाडौ । विश्वकै प्रसिद्ध टाइम पत्रिकाले विश्वका उदयमान सय नेताको सूचीमा काठमाडौं महानगर प्रमुख बालेन्द्र शाह ‘बालेन’ लाई समावेश गरेको छ । अमेरिकी पत्रिका टाइमले भविष्यमा आफ्नो क्षेत्रलाई नेतृत्व गर्न सक्ने विश्वका एक सय उदीयमान नेतृत्वको सन् २०२३ को सूची ‘टाइम १०० नेस्क्ट’ मा बालेनलाई समावेश गरेको हो । २०७९ वैशाखको स्थानीय चुनावमा काठमाडौं महानगरको प्रमुखमा स्वतन्त्र उम्मेदवार बनेका ३३ वर्षीय इन्जिनियर शाहले सामाजिक सञ्जाल टिकटक, फेशबुक, ट्विटरको मद्दतले ‘बालेन इफे’क्ट सिर्जना गरेको पत्रिकाले उल्लेख गरेको छ । पत्रिकाले चुनावी अभियानका क्रममा शाहले काठमाडौंको फोहोर मैला तथा सरसफाईको प्रबन्ध, स्वच्छ खानेपानी, सफा सडक र संस्कृतिक सम्पदाको संक्षरणसहितको सहरी विकासको प्रतिबद्धता गरेको जनाएको छ । आफ्ना प्रतिबद्धता पुरा गर्नेक्रममा शहरी गरीबमाथि परेको असर र उनीहरु बस्ने घर भत्काउने कार्य गैरकानुनी देखिएको भन्दै उनले आलोचना खेप्नु परेको पनि टाइमले उल्लेख गरेको छ । टाइम म्यागेजिनले हरेक वर्ष विभिन्न ६ विधालाई समेटेर विश्वका १ सय प्रभावशाली व्यक्तिको सूची सार्वजनिक गर्दै आएको छ । जसमा राजनीतिकर्मी, वैज्ञानिक, संस्थाहरुका प्रभावशाली सीईओ, कलाकार पर्दै आएका छन् । म्यागेजिनले २०१९ देखि उदीयमान नेताहरुको सूची पनि निकाल्न थालेको हो ।