मर्निङवाक गएकी युवतीमाथि हातखुट्टा बाँधेर सामूहिक बलात्कार

विराटनगर । मोरङमा २२ वर्षीया युवतीमाथि सामूहिक बलात्कार भएको छ । मंगलबार बिहान विराटनगर महानगरपालिका नजिकै मर्निङवाकमा गएकी ती युवतीमाथि बलात्कार भएको हो ।

युवतीलाई बाँसको झ्याङमा लगेर हातखुट्टा बाँधी मुखमा पट्टी लगाएर सामूहिक बलात्कार गरिएको पीडितको बयानलाई उद्धृत गर्दै प्रहरीले जनाएको छ । अर्धचेत अवस्थामा भेटिएकी उनको विराटनगरस्थित कोशी अस्पतालमा उपचार भइरहेको छ ।

मोरङ प्रहरीका अनुसार प्रारम्भिक अनुसन्धानले युवतीमाथि सामूहिक बलात्कार भएको पुष्टि भएको छ । प्रहरीले घटनाको अनुसन्धान शुरु भएको र दोषीको पहिचान र पक्राउका लागि खोजी कार्य तीव्र पारिएको बताएको छ ।