सुन प्रकरणको अनुसन्धान प्रतिवेदन सरकारी वकिललाई बुझाइँदै, ५० जनालाई प्रतिवादी बनाउन सिफारिस, ३ अर्ब ५० करोड बिगो माग

Avenues

भदौ २७, २०८० बुधबार

काठमाडौ । सुन तस्करी प्रकरणमा नेपाल प्रहरीको केन्द्रीय अनुसन्धान ब्युरो सीआईबीले ३ अर्ब ५० करोड, २ लाख १६ हजार ५ सय ५२ रुपैयाँ विगो कायम गरेको छ । ६० किलो सुन तस्करी प्रकरणको फाइल सरकारी वकिल कार्यालयलाई बुझाउनुअघि आयोजित पत्रकार सम्मेलनमा सीआईबीले यस्तो जानकारी दिएको हो । सीआईबीले ६० किलो सुन तस्करी प्रकरणमा ५० जनालाई प्रतिवादी बनाउन सिफारिस गरेको छ । सीआईबीले हालसम्म २३ नेपाली र ९ विदेशी पक्राउ परेको जानकारी दिँदै ५० जनाविरुद्ध मुद्दा चलाउन सरकारी वकिल कार्यालयलाई सिफारिस गरेको हो । सुन तस्करीको प्रकरण अनुसन्धानलाई जारी राख्दै मुद्दा चलाउने गरी राय दिएको हो । त्यसैगरी सुन अवैध पैठारी गर्न खडा गरिएका अन्य पाँच वटा कम्पनीहरू मार्फत ल्याईएको सुनको विवरणको पनि थप अनुसन्धान जारी राखिएको सीआईबीले जानकारी दिएको छ । सीआईबीका अनुसार १४ विदेशी र ४ नेपाली फरार छन् । सीआईबीले थप ३ सय २ किलो सुन तस्करी भएको निष्कर्ष पनि निकालेको छ । तस्करी गर्ने समूहले पहिला ३०२ किलो र अहिले ६० गरी ३६२ किलो सुन भित्र्याएको पाइएको सीआईबीले जनाएको हो । पक्राउ परेकाविरुद्ध भन्सार ऐनअन्तर्गत अवैध सुन पैठारी र संगठित अपराध, नागरिकता सम्बन्धी ऐन, राहदानी ऐन, अध्यागमन ऐन सम्बन्धी कसुरको कारबाही अगाडि बढाउन पनि सीआईबीले राय दिएको छ । अनुसन्धानका क्रममा ५ जनाले विदेशी नागरिकता लिएको देखिएको प्रहरीको भनाइ छ । गत साउन २ गते राजस्व अनुसन्धान विभागले भन्सार परिसर बाहिर सुन बरामद गरी १९ दिनसम्म अनुसन्धान गरेर आजै प्रतिवेदन सरकारी वकिलको कार्यालयलाई बुझाउदै छ ।