जर्मनीमा क्रिसमस मार्केटमा कारले ठक्कर दिँदा मृत्यु हुने ५ पुगे,२ सय जना घाइते

एनेन्सी । जर्मनीको क्रिसमस मार्केटमा तीव्र गतिको कारले ठक्कर दिँदा मृत्यु हुनेको संख्या  ५ पुगेको  छ भने २ सय जना घाइते भएका छन् । 

दुर्घटना जर्मनीको म्याग्डेबर्गमा भएको हो । मृत्यु हुनेमा एक बालक पनि रहेको बी.बी.सी ले जनाएको छ । सामाजिक सञ्जालमा सार्वजनिक भएको भिडीयोमा पसलहरू बीचको साँघुरो गल्लीमा कार तीव्र गतिमा गुडिरहेको र धेरै जनालाई ठक्कर दिएको देखिएको छ । 

स्थानीय अधिकारीहरूका अनुसार आक्रमण जानाजानी भएको हुनसक्ने आशंका छ । प्रहरीले एक संदिग्ध व्यक्तिलाई पक्राउ गरेको छ । ती व्यक्ति ५० वर्षीय साउदी नागरिक रहेको जर्मनी प्रहरीले जनाएको छ । उनी सन् २००६ देखि जर्मनीमा डाक्टरका रूपमा कार्यरत रहेको समाचारमा उल्लेख छ ।घाइतेमध्ये ४० जनाको अवस्था गम्भीर रहेको समाचारमा जनाइएको छ ।