एमाले उपाध्यक्ष नेम्वाङको हृदयघातका कारण निधन

संविधानसभा अध्यक्ष एवं नेकपा एमालेका उपाध्यक्ष सुवासचन्द्र नेम्वाङको ७१ वर्षको उमेरमा हृदयाघातबाट निधन भएको छ । उनलाई बालुवाटारस्थित घरमै हृदयाघात भएकोमा उपचारका लागि महाराजगञ्जस्थित त्रिवि शिक्षण अस्पतालमा लगिएको थियो तर उनको बाटोमै निधन भएको चिकित्सकले बताएका छन । राती १ बजेर २० बजे अस्पताल पु¥याइएका नेम्बाङको ४ बजेर २० मिनेटमा औपचारिकरुपमा निधन भएको अस्पतालले घोषणा गरेको हो । शौचालयमा बेहोस अवस्थमा भेटिएपछि उनलाई परिवारका सदस्यले अस्पताल पु¥याएका थिए । उनलाई हृदयघात भएको बताइएको छ । नेम्वाङको निधन भएपछि सम्मानका विषयमा निर्णय गर्न मन्त्रिपरिषद बैठक बस्दैछ । उनलाई कस्तो सम्मान दिने भन्ने विषयमा प्रधानमन्त्री पुष्पकमल दाहालले परामर्श गरिरहेका छन । सरकारले संविधानसभा अध्यक्ष सुवास नेम्वाङलाई राष्ट्रिय सम्मान दिने तयारी गरेको छ । राष्ट्रिय सम्मानको निर्णय भएमा नेम्वाङको शव व्यवस्थापनदेखि अन्त्येष्टिसम्म नेपाली सेना संलग्न हुनेछ । अन्तिम सम्मानसम्बन्धी कार्यविधिमा तोकिएका बाहेक अरुको हकमा राष्ट्रिय सम्मानबारे मन्त्रिपरिषदले निर्णय गर्नुपर्ने व्यवस्था छ । त्यस्तै नेकपा एमालेको सचिवालय बैठकपनि बिहान ११ बजेपछि बस्दैछ । बैठकले पार्टीको झण्डा झुकाउने, देशभर श्रद्धाञ्जलीका कार्यक्रमलगायतका कार्यक्रम घोषणा गर्नेछ । नेम्वाङको पार्थिव शरीर श्रद्धाञ्जलीका लागि च्यासलस्थिल पार्टी कार्यालयमा राखिदै छ । नेम्वाङको अन्तिम संस्कार भोलि गरिने भएको छ । दिवंगत नेम्वाङका जेठो छोरा मिङ्सो नेम्वाङ बेलायतबाट भोलि ४ बजे र  कान्छो छोरा सुहाङ नेम्वाङ अष्ट्रेलियाबाट आज राति ११ आइपुग्ने बताइएको छ । एमाले पार्टी कार्यालयमा श्रद्धाञ्जलीपछि मुन्धुम संस्कृतिअनुसार पूजाआजा गरेर अन्तिम संस्कार गरिने परिवारले जनाएको छ ।  राष्ट्रपति रामचन्द्र पौडेल र प्रधानमन्त्री पुष्पकमल दाहालले नेम्वाङको निधनबाट आफू मर्माहत भएको बताएका छन् ।