जर्मनमा कारको ठक्कर बाट २ जनाको मृत्यु, ६८ जना घाइते

एजेन्सी । जर्मनीको क्रिसमस मार्केटमा तीव्र गतिको कारले ठक्कर दिँदा  २ जनाको मृत्यु भएको छ भने ६८ जना घाइते भएका छन् । 

दुर्घटना जर्मनीको म्याग्डेबर्गमा भएको हो । मृत्यु हुनेमा एक बालक पनि रहेको बी.बी.सी ले जनाएको छ । सामाजिक सञ्जालमा सार्वजनिक भएको भिडीयोमा पसलहरू बीचको साँघुरो गल्लीमा कार तीव्र गतिमा गुडिरहेको र धेरै जनालाई ठक्कर दिएको देखिएको छ । 

स्थानीय अधिकारीहरूका अनुसार आक्रमण जानाजानी भएको हुनसक्ने आशंका छ । प्रहरीले एक संदिग्ध व्यक्तिलाई पक्राउ गरेको छ । ती व्यक्ति ५० वर्षीय साउदी नागरिक रहेको जर्मनी प्रहरीले जनाएको छ । 

उनी सन् २००६ देखि जर्मनीमा डाक्टरका रूपमा कार्यरत रहेको समाचारमा उल्लेख छ ।