एमाले महासचिव पोखरेल र चिनिया कम्युनिष्ट पार्टीका विदेश विभाग प्रमुखविच भेटवार्ता

चीन भ्रमणमा रहेका एमाले महासचिव शंकर पोखरेलले नेपालले जारी गरेको नयाँ नक्सामा चीनले पनि साथ दिनुपर्ने बताएका छन् । बेइजिङमा महासचिव पोखरेल र सीपीसीका विदेश विभाग प्रमुख लिउ जियानचाओविच आज भएको भेटमा उनले नक्साबारे चिनिया पक्षको ध्यानाकर्षण गराएका हुन । चीनले हालै जारी गरेको नक्सामा नेपालको लिम्पियाधुरा, लिपुलेक र कालापानी क्षेत्र नदेखाएको विषयमा नेपालमा विरोध हुँदै आएको छ ।  नेपाल एक चीनको पक्षमा दृढ रहेको र नेपालको भूमिबाट चीन विरोधी गतिविधि गर्ने कामलाई अस्वीकार गर्ने जानकारी पनि भेटमा पोखरेलले गराएका छन । महासचिव पोखरेलले नेकपा एमाले असंग्लन परराष्ट्र नीति र पञ्चशीलको आधारमा हाम्रो अन्तर्राष्ट्रिय सम्बन्ध र सहकार्यलाई कायम राख्न चाहेको पनि उल्लेख गरेका छन् । महासचिव पोखरेलले ओलीको चीन भ्रमण र चिनियाँ राष्ट्रपति तथा सीपीसीका महासचिव सी चिन्फिङको नेपाल भ्रमणका क्रममा भएका सहमति, सम्झौता छिटोभन्दा छिटो कार्यान्वयनको पक्षमा रहेको उल्लेख गरेका छन् । सो क्रममा विदेश विभाग प्रमुख लिउले भने चीन र नेपालबीचको घनिष्ठ सम्बन्ध नचाहने शक्तिहरुपनि भएकाले विगतमा सहमति कार्यान्वयन गर्ने पक्षमा आफुहरु रहेको बताएका छन । विगतका सहमति, सम्झौताहरू कार्यान्वयन छिटो गराउने प्रतिबद्धता समेत उनको छ । महासचिव पोखरले नेतृत्वको प्रतिनिधिमण्डल दुई साता लामो चिन भ्रमणमा रहेको छ ।