तिंकरको छ्यालेकमा सशस्त्र प्रहरीको बोर्डर आउट पोष्ट स्थापना

दार्चुलामा भारतसँग सीमा जोडिएको क्षेत्रमा सुरक्षा उपस्थिति जनाएको सशस्त्र प्रहरीले अब चीनसँगको सीमामा पनि सुरक्षा उपस्थिति जनाएको छ । दार्चुलाको व्याँस गाउँपालिका–१ तिंकरको छ्यालेकमा सशस्त्र प्रहरीको बोर्डर आउट पोष्ट (बिओपी) स्थापना गरिएको हो । बिओपीको सशस्त्र प्रहरीका अतिरिक्त महानिरीक्षक बंशीराज दाहाल र दार्चुलाका प्रमुख जिल्ला अधिकारी किरण जोशीले संयुक्त रुपमा उद्घाटन गरेका हुन् । सो अवसरमा सशस्त्र प्रहरी बल नेपालका अतिरिक्त महानिरीक्षक वंशीराज दाहालले सीमा सुरक्षाको जिम्मेवारीमा रहेको सशस्त्र प्रहरीले भारत र चीन सीमामा सुरक्षा उपस्थिति बढाउँदै सीमा सुरक्षा, सीमा अपराध नियन्त्रणजस्ता कार्यलाई प्राथमिकतामा राखेको बताए । 
तिंकरमा स्थापना गरिएको बोर्डर आउट पोष्टको सुरक्षार्थ सशस्त्र प्रहरी निरीक्षक जनक पौडेलको कमाण्डमा २० जनाको टोली खटाइएको छ । बीओपी स्थापना कार्यक्रममा स्थानीयहरुले तिंकर नाका सुचारु गर्नका लागि पहल गर्न माग गरे । 
व्यापारिक तथा धार्मिक पर्यटनको हिसावले महत्वपूर्ण रहेको तिंकर नाका विगत ४ वर्षदेखि बन्द रहेको छ ।