कान्ति अस्पतालमा बालिका मृत्यु प्रकरणमा दोषी देखिनेलाई कारबाही हुन्छ: स्वास्थ्यमन्त्री बस्नेत

स्वास्थ्य तथा जनसङ्ख्यामन्त्री मोहनबहादुर बस्नेतले कान्ति बाल अस्पतालमा बालिका मृत्यु प्रकरणको छानबिन गरी दोषिउपर कारबाही हुने बताएका छन । इजिप्टको राजधानी कायरोमा सम्पन्न भएको जनसंख्या, स्वास्थ्य तथा विकास सम्मेलनमा भाग लिएर फर्कने क्रममा आज विहान विमानस्थलमा पत्रकारहरुसँग कुरा गर्दै मन्त्री बस्नेतले उपचार नपाएर विरामीको मृत्यु भएको विषयमा दोषीमाथि कारबाही हुने बताएका हुन । मन्त्री बस्नेतले घटनाको छानबिन गर्न छानबिन समिति गठन भएको र गल्ती गर्नेहरुलाई कारबाही गरिने स्पष्ट पारे । 
केही दिन अघि कान्ति बाल अस्पतालमा पाँच वर्षीया रेजिशा गोपालीले इमर्जेन्सीमा उपचार नपाएर मृत्यु भएको खबर सार्वजनिक भएको थियो । मन्त्री बस्नेतले इजिप्टमा बसाइँसराई र अव्यवस्थित बसोबासका दृष्टिले स्वास्थ्य क्षेत्रमा परेका समस्याबारे गम्भीर छलफल भएको जानकारी दिए । त्यसैगरी आधारभुत स्वास्थ्य सेवा दिने कुरालाई व्यवस्थित गर्ने रणनीतिको सम्बन्धमा पनि छलफल भएको उनको भनाइ थियो ।