रोशीका बाढी पहिरो प्रभावितलाई बल्ल अस्थायी आवास निर्माण

काभ्रेपलाञ्चोक । गत असोज दोस्रो साता बाढी पहिरोले घर पूर्ण रूपमा क्षति भएका परिवारका लागि रोशी गाउँपालिकाले अस्थायी आवास निर्माण थालेको छ । 

बाढी पहिरोमा परी उक्त गाउँपालिकामा १२ जनाको ज्यान गएको थियो भने ४ सय ८२ घर पूर्ण रूपमा तथा ८ सय ८३ घर आंशिक रूपमा क्षति पुगेको थियो ।

चिसो बढ्दै गए पछि बाढी पहिरो पीडित अझ प्रभावित हुने भए पछि पहिलो चरणमा घर पूर्ण रूपमा क्षति भएका परिवारका लागि अस्थायी आवास निर्माण थालिएको गाउँपालिकाले जनाएको छ । गाउँपालिकाका अध्यक्ष दिनेश लामाका अनुसार हाल वडा नं २ बाट अस्थायी आवास निर्माणको काम शुरु गरिएको हो । यस वडामा ३० अस्थायी आवास निर्माण हुनेछ ।

विभिन्न सहयोगी संस्थाको साझेदारीमा विपद पीडितको अस्थायी आवास निर्माण भइरहेको जनाइएको छ । “अस्थायी आवासले छिमेक एवं आफन्तको घरमा बसेका तथा तथा टहरामा बसेकालाई राहत पुग्नेछ, हामी सहयोग जुटाएर पहिलो चरणमा पूर्ण रूपमा घर क्षति भएकालाई अस्थायी आवास बनाउने क्रममा छौँ”, अध्यक्ष लामाले भने । उनका अनुसार बाढी पहिराले २ हजार ५ सय ४४ परिवारको खेतबारीमा क्षति पुगेको थियोभने १ सय ६० खानेपानी आयोजना, एक पक्की पुल, ४७ विद्यालय, चार स्वास्थ्य केन्द्रमा क्षति पुगेको थियो । यस्तै, बाढी पहिराले निर्माण सम्पन्न भएको डम्फू उद्यान, १० शय्याको अस्पताल, चिस्यान केन्द्र सहितको औद्योगिक ग्राम बगाएको थियो ।

स्थानीय स्रोत, साधन प्रयोग गरी अस्थायी आवास निर्माण भइरहेको हो । वडा नं २ मा राष्ट्रिय विपद् जोखिम न्यूनीकरण तथा व्यवस्थापन प्राधिकरण बाट स्वीकृत मापदण्ड अनुसार नै अस्थायी आवास निर्माणको काम भइरहेको उनले बताउनुभयो । उनका अनुसार व्यक्तिगत सहयोगमा वडा नं ९ नार्के तथा आसपास ३० अस्थायी आवास निर्माणको काम भइरहेको छ ।   

उक्त गाउँपालिकाले विपद् व्यवस्थापनका लागि गत कात्तिक ३० गते नै विशेष गाउँसभा मार्फत चालु आर्थिक वर्षमा योजनाका लागि विनियोजित बजेट बाट केही प्रतिशत कटौती गर्ने निर्णय गरेको थियो । गाउँपालिकाले विपद्सँग सम्बन्धित बनाएर दुई सय ६६ योजना संशोधन गरेको छ भने विपद् कोष  २ करोड ८० लाखको बनाएको जनाएको छ । कोषको रकमले स्थानीय तहमा अत्यावश्यक विपद् खर्च, बाढी पहिराले पुर्‍याएको क्षतिको तथ्याङ्क सङ्कलन, राहत वितरण लगायत विविध शीर्षकमा खर्च गर्नेगरी संशोधन गरिएको थियो । 

अध्यक्ष लामाका अनुसार तत्कालका लागि विपद्ले क्षति पुर्‍याएका पूर्वाधारको मर्मत तथा निर्माणका लागि १ करोड, विपद् हेल्पडेस्कका लागि ५ लाख, तथ्याङ्क सङ्कलन तथा जनशक्ति परिचालनमा १० लाख, राहत (खाद्यान्न, लत्ताकपडा)का लागि ५० लाख, मृतक परिवारलाई प्रतिपरिवार ५० हजार, मर्मत सम्भारमा ५० लाख, विपद् सामग्री खरिदमा १० लाख तथा बाढी पीडितलाई सहायताका लागि ५५ लाख बजेट विनियोजन गरिएको छ । गाउँपालिकाले गत असारमा पारित बजेटको आकार घटाएको हो । चालु आर्थिक वर्षका लागि विनियोजित ६९ करोड २० लाख ९८ हजारमा ३ करोड ४३ लाख घटाएर ६५ करोड ७७ लाख ९८ हजार बजेट कायम गरेको छ ।