दक्षिण भारतीय अभिनेता अल्लू अर्जुन पक्राउ

काठमाडौं । दक्षिण भारतीय अभिनेता अल्लू अर्जुन पक्राउ परेका छन् । 

भारतको एक सिनेमा घरमा हालै प्रदर्शनमा आएको उनको फिल्म पुष्पा–२ को प्रदर्शनका क्रममा मच्चिएको भागदौडमा एक महिलाको मृत्यु भएको थियो । उक्त प्रकरणमा अर्जुनविरुद्ध प्रहरीका उजुरी दर्ता भएको थियो ।

डिसेम्बर ४ मा पुष्पा–२ को रिलिजपूर्व हैदराबादको सन्ध्या थिएटरमा फिल्मको स्क्रिनिङ राखिएको थियो । फिल्म हेर्नका लागि दर्शकले पहिले नै टिकट काटेर हलमा पुगेका थिए ।

अल्लू अर्जुनसहित फिल्मको टिम उक्त हलमा अचानक पुगेपछि त्यहाँ भागदौड मच्चिएको थियो । भागदौडका क्रममा एक महिलाको मृत्यु भएपछि अल्लू अर्जुनसहित अन्य केही व्यक्तिविरुद्ध पनि प्रहरीमा उजुरी परेको थियो ।

भागदौडमा एम रेवाथी नाम गरेकी महिलाको मृत्यु भएको थियो । अर्जुनले उक्त महिलाको परिवारलाई २५ लाख रुपैयाँ सहयोग गर्ने समेत घोषणा गरिसकेका छन् ।