साउदी अरेबियाले सन् २०३४ को फिफा विश्वकप आयोजना गर्ने

काठमाडौं । साउदी अरेबियाले सन् २०३४ को फिफा विश्वकप आयोजना गर्ने अधिकार प्राप्त गरेको छ । 

१० वर्ष पछि हुने यो विश्वकपलाई लिएर नेपालको पनि चासो छ । फिफा अध्यक्ष जियानी इन्फान्टिनोले मध्यपूर्वी राष्ट्र साउदीलाई अधिकार दिइएको घोषणा गरेका हुन् । फिफाको एक्स्ट्रा अर्डिनरी कंग्रेसको भर्चुअल बैठकले साउदीलाई विश्वकप आयोजक राष्ट्रका रूपमा स्वीकार गर्ने निर्णय गरेको हो । 

बैठकमा फिफाका सबै २११ सदस्य राष्ट्रको उपस्थिति थियो । साउदीलाई विश्वकप गर्न दिएकोमा भने मानवअधिकार क्षेत्रमा काम गर्ने विभिन्न संघ संस्थाहरूले विरोध जनाएका छन् । साउदीले मानव अधिकारको उल्लंघन गरिरहेको आरोप उनीहरूको छ ।

एम्नेस्टी इन्टरनेशनलले अन्य फरक २१ संस्थाहरूले संयुक्त रूपमा विज्ञप्ति निकाल्दै फिफाको निर्णयको आलोचना गरेका छन् । धेरै मानिसको जीवन खतरामा रहेको भन्दै फिफाले सामान्य मानव अधिकार रक्षाका सुनिश्चितता नै नगरी साउदीलाई आयोजक बनाएको एम्नेस्टी इन्टरनेशनलको भनाइ छ । 

यसअघि २०२२ को कतार विश्वकपमा पनि फिफाको निर्णयको आलोचना भएको थियो । फिफाले २०३० को आयोजक राष्ट्र पनि घोषणा गरेको छ । पोर्चुगल, मोक्को र स्पेनले अधिकार प्राप्त गरे । अर्जेन्टिना, उरुग्वे र पाराग्वेमा पनि विश्वकप खेल संचालन हुनेछ ।