पाल्पामा सुख्खा पहिरोले जीप पुर्दा तीन जनाको मृत्यु

पाल्पाको रिब्दीकोट गाउँपालिका–२ देउराली जोर्ते र लघुवाको बीचमा सुख्खा पहिरोले जीप पुरिँदा तीन जनाको मृत्यु भएको छ । तम्घासबाट बुटवल जाँदै गरेको लु.१ज ४६०० नम्बरको जीप आज बिहान ढुंगासहितको पहिरोले पुरिएको हो । दुर्घटनामा परी तीन जनाको घटनास्थलमै मृत्यु भएको प्रहरीले जनाएको छ । ज्यान गुमाउनेमा जिल्ला प्रहरी कार्यालय गुल्मीमा कार्यरत प्रहरी सहायक हवल्दार ३२ वर्षीय यमबहादुर बोहरा र गुल्मीको रेसुंगा नगरपालिका– ७ की ५० वर्षीया मनकला सुदारा रहेका छन् । अर्का एक मृतक पुरुषको सनाखत हुन बाँकी रहेको छ । दुर्घटनामा घाइते भएका एक बालकसहित ८ जनालाई उपचारका लागि तानसेन पठाएको छ । दुर्घटनास्थलमा सडक डिभिजन कार्यालयले राति १० बजेदेखि ४ बजेसम्म सडक बन्द गरेर सडक स्तरोन्नती गर्दै आएको थियो ।