एशिया कपको तयारीका लागि नेपाली टोलीद्वारा कराँचीमा अभ्यास शुरु

एसिया कप २०२३ को अन्तिम तयारीका लागि नेपाली राष्ट्रिय क्रिकेट टिमले आजवाट कराँचीमा अभ्यास सुरु गरेको छ । बुधबार दिउसो पाकिस्तान पुगेको टोलीले आजवाट अभ्यास थालेको हो । कराचीमा नेपालले त्यहाँ एक साता तयारी गर्नेछ । यसैविच नेपाली क्रिकेट टोलीका स्पिनर सन्दीप लामिछाने एसिया कप खेल्न जाने भएका छन् । पछिल्लो एक वर्षदेखि १७ वर्षीय एक बालिकालाई बलात्कार गरेको आरोपमा मुद्दा खेपिरहेका सन्दीप आइतबार राती पाकिस्तान जाने भएका छन् । मुद्दाको  आइतबार जिल्ला अदालतमा पेशी छ । एक साता पाकिस्तानमा तयारीका दौरान नेपालले स्थानीय टिमसँग अभ्यास खेल खेल्नेछ  त्यसपछि नेपाल घरेलु टिम पाकिस्तानसँग खेल्न मुल्तान पुग्नेछ । एकदिवसीय फम्र्याटमा हुने एसिया कपमा नेपाल समूह ‘ए’ मा छ । समूहमा नेपालले पाकिस्तान र भारतसँग भिड्नेछ । एसिया कपको आयोजक पाकिस्तान भए पनि अधिकांश खेलहरू श्रीलंकामा हुँदैछन् । भारतले पाकिस्तानमा गएर खेल्न अस्वीकार गरेपछि खेल श्रीलंकामा हुन लागेका हुन । एसिया कपको पहिलो पहिलो खेल नेपालले भदौ १३ पाकिस्तानसँग खेल्नेछ । नेपाल समूह चरणको दोस्रो खेल खेल्न भने पाकिस्तानबाट श्रीलंका पुग्न पर्नेछ । नेपालले दोस्रो खेलमा भारतविरुद्ध भदौ १८ मा श्रीलंकामा खेल्नेछ । तीन–तीन टिमको समूहबाट शीर्ष दुई दुई टिम गरी चार टिमले सुपर फोर खेल्नेछन । सुपर फोरपछि एसिया कपको फाइनल भदौ ३१ मा हुनेछ ।।