कैलालीमा २ जना युवकलाई अपहरण गरेको आरोपमा ३ जना पक्राउ

काठमाडौं । जिल्लाको धनगढीमा २ जना युवकलाई अपहरण गरेको आरोपमा ३ जनालाई प्रहरीले पक्राउ गरेको छ ।

पक्राउ पर्नेमा कञ्चनपुरको बेलौरी नगरपालिका–५ घर भई अध्ययनका लागि धनगढी उपमहानगरपालिका बस्दै आएका १८ वर्षीय अमित नेगी, डडेल्धुराका १८ वर्षीय विशाल भट्ट र कैलालीको गोदावरी नगरपालिका–१ अत्तरियाका २४ वर्षीय भुपी खड्का रहेका छन् ।

प्रहरीका अनुसार उनीहरूलाई अपहरण गरी बन्धक बनाएर लागुपदार्थ खुवाउँदै कुटपिट गरेको आरोपमा पक्राउ गरिएको हो । उनीहरूका साथबाट एक थान खुकुरी पनि बरामद गरिएको प्रहरीले बताएको छ ।

आरोपित तीन जनाले धनगढी उपमहानगरपालिका–४, तारानगर कोठा भाडामा बस्ने दुई जना १७ वर्षीय युवकलाई आइतबार कोठाबाट अपहरण गरेको भेटिएको छ,’ प्रहरीले भन्यो, ‘धनगढी उपमहानगरपालिका–४ तारानगरस्थित बाझो घरमा बन्धक बनाएर पाँच ट्याब्लेट लागुऔषध खुवाएर कुटपिट गरेको उनीहरुलाई आरोप लागेको छ ।’

चेकजाँचका क्रममा कुटपिट गरेको भिडियो पनि भेटिएको र थप अनुसन्धान भइरहेको प्रहरीले जनाएको छ ।