जटिल रोग लागेकालाई लुम्बिनी सरकारले २ लाख सहयोग गर्ने

लुम्बिनी ।  लुम्बिनी प्रदेशमा स्वास्थ्य उपचार विशेष आर्थिक सुविधा निर्देशिका २०७८ (पहिलो संशोधन २०८१) कार्यान्वयनमा आएको छ । निर्देशिका अनुसार जटिल रोग लागेका बिरामीले अब २ लाख आर्थिक सहयोग पाउने छन् । 

प्रदेशका १२ जिल्लाका स्वास्थ्य कार्यालय मार्फत मुटुको भल्व फेर्ने, क्यान्सर उपचार र मिर्गौला प्रत्यारोपण गर्ने बिरामीलाई दृष्टिगत गरी संशोधित निर्देशिका कार्यान्वयनमा आएको हो ।  

मुख्यमन्त्री चेतनारायण आचार्यले एउटा सिफारिस बनाउनकै लागि स्वास्थ्य सेवा निर्देशनालय धाउनुपर्ने बाध्यताको अन्त्य गरिएको र यस बाट बिरामी र उनीहरुका परिवारका सदस्यहरुलाई सहज भएको बताए । 

यसअघि प्रदेश स्वास्थ्य सेवा निर्देशनालय बाट उपचार सुविधाको सिफारिस हुँदै आएको थियो । अब देखि सम्बन्धित जिल्लाको स्वास्थ्य कार्यालय बाट सिफारिस गर्ने व्यवस्था मिलाइएको प्रदेशका स्वास्थ्यमन्त्री खेमबहादुर सारुले बताए । 

लुम्बिनी प्रदेश सरकारले मुटुको भल्ब फेर्न, क्यान्सरको उपचार र मिर्गौला प्रत्यारोपणका लागि एक जना बिरामीलाई २ लाखको व्यवस्था गरेको छ ।
रासस