बालकुमारीमा आगलागी, ४ वटा पसल जलेर नष्ट

काठमाडौं । बालकुमारी स्थित एउटा घरमा मध्यरातमा विद्युत् चुहावट भएर आगलागी भएको छ । 

महानगरीय प्रहरी प्रभाग कोटेश्वरका अनुसार बालकुमारी स्थित सि.सि.आर.सी. कलेज नजिक स्वाभिमान श्रेष्ठको दुई तले घरमा एक्कासी विद्युत् चुहावट भएर आगलागी भएको हो । आगलागी बाट घरको पहिलो तलामा भोजराज भट्टले सञ्चालन गरेको ‘डगेरा फार्मेसी’ जलेर नष्ट भएको प्रभागका सहायक हवल्दार रुद्रप्रसाद गौतमले जानकारी दिए । 

यसैगरी आगलागी बाट श्रेष्ठको घर सँगै एउटा पान पसल र मःम पसल जलेर नष्ट भएको प्रहरीले जनाएको छ । सँगै को ‘जुम्बा डान्स सेन्टर’ पनि जलेर नष्ट भएको छ । आगलागी बाट भएको क्षतिको विवरण यकिन नभएको प्रहरीले जनाएको छ । 

पाँच वटा दमकलको सहयोगमा एक घण्टा पछि आगो निभाइएको थियो । आगो निभाउन काठमाडौंका तीन र ललितपुरका दुई वटा दमकलका साथै प्रहरी परिचालन गरिएको थियो । 
रासस