उपनिर्वाचनमा सेना परिचालनको लागि अपनाउनुपर्ने विधि सिफारिस

काठमाडौं । राष्ट्रिय सुरक्षा परिषद्ले यही मङ्सिर १६ गते हुने स्थानीय तहको उपनिर्वाचनका क्रममा नेपाली सेना परिचालनका लागि अपनाउनुपर्ने विधि अवलम्बन गर्नका लागि मन्त्रिपरिषदमा  सिफारिस गरेको छ ।

प्रधानमन्त्री के.पी. शर्मा ओलीको अध्यक्षतामा मङ्गलबार बसेको परिषदको ३६औँ बैठकले स्थानीय तहको उपनिर्वाचन स्वतन्त्र, निष्पक्ष र भयरहित वातावरणमा सम्पन्न गर्न सेनाको परिचालन सम्बन्धी विधि मन्त्रिपरिषदमा पठाउन सिफारिस गरेको रक्षा मन्त्रालयका सचिव रामेश्वर दङ्गालले जानकारी दिए ।

नेपालको संविधान २०७२ को धारा २६६ को उपधारा १ मा मुलुकको समग्र राष्ट्रिय हित, सुरक्षा र प्रतिरक्षा सम्बन्धी नीति तर्जुमा गर्न तथा नेपाली सेनाको परिचालन गर्नका लागि राष्ट्रिय सुरक्षा परिषदले मन्त्रिपरिषदलाई सिफारिस गर्नुपर्ने व्यवस्था छ । 

बैठकमा उपप्रधानमन्त्री तथा अर्थ मन्त्री, परराष्ट्र मन्त्री, रक्षा मन्त्री, मुख्यसचिव, नेपाली सेनाको प्रधानसेनापति र रक्षा सचिव उपस्थित थियो ।
रासस