प्रहरीको केन्द्रीय अनुसन्धान ब्युरो (सिआइबी) द्धारा ‘फोक्सट्रोट चार्ली’ नामक अपरेसनका क्रममा थप सात जनालाई पक्राउ

काठमाडौं । प्रहरीको केन्द्रीय अनुसन्धान ब्युरो (सिआइबी)ले ‘फोक्सट्रोट चार्ली’ नामक अपरेसनका क्रममा थप सात जनालाई पक्राउ गरेको छ । एमबिबिएस अध्ययन गर्न जाने प्रयोजनका लागि आफ्नो शैक्षिक योग्यताको प्रमाणपत्र नक्कली बनाएकाले उनीहरूलाई पक्राउ गएिएको सिआइबीले जनाएको छ ।

पक्राउ परेका सातजनालाई सिआइबीले शुक्रबार राति सार्वजनिक गरेको हो । पक्राउ पर्नेमा अनु फार्मेसी विराटनगरमा कार्यरत मोरङका ३४ वर्षीय मनित चौधरी, त्रिभुवन विश्वविद्यालय शिक्षण अस्पताल महाराजगञ्जमा कार्यरत बाराका ३४ वर्षीय अमित चौधरी, एमडी अध्ययनको तयारी गरेकी काठमाडौंकी २९ वर्षीया एरिना शाह, इसान बाल अस्पताल वसुन्धरामा कार्यरत ललितपुरकी ३३ वर्षीया श्रद्धा शिल्पकार, काठमाडौँका २८ वर्षीया पुनम थापा, बागमती अस्पताल रौतहटमा कार्यरत सिरहाका ३२ वर्षीय रामबाबु यादव र चितवन मेडिकल कलेजमा अध्ययनरत सप्तरीका २८ वर्षीय नसिम अख्तर रहेका छन् ।

ब्युरोका प्रवक्ता एवं प्रहरी उपरीक्षक सञ्जयसिंह थापाले शैक्षिक योग्यतामा अंक वास्तविकभन्दा थपघट गरी काम गरिरहेको र पढिरहेकाहरूलाई पक्राउ गरिएको जानकारी दिए। प्रहरीले राष्ट्रिय परीक्षा बोर्ड, परीक्षा नियन्त्रण कार्यालय, सानोठिमी, भक्तपुरलाई पत्राचार गरी यकिन गरी नक्कली भएको आधारमा उनीहरूलाई पक्राउ गरी अनुसन्धान गरेको हो। पक्राउ परेका सातैजनालाई काठमाडौं जिल्ला अदालतबाट पाँच दिनको म्याद थप गरी अनुसन्धान भइरहेको प्रवक्ता थापाले बताए ।

यसअघि सिआइबीले ८ जना पक्राउ गरेकोमा सांसल सुनिल शर्मा थुनामुक्त रहेका छन् । सिआइबीले एसएलसी तथा प्रमाणपत्र तहमा नक्कली प्रमाणपत्र तह बनाएर चिकित्सा शिक्षाको योग्यता हासिल गरेको पाइएपछि ‘फोक्सट्रोट चार्ली’ अपरेसन चलाएको हो।