बैंकले घटाए मंसिरका लागि ब्याजदर

काठमाडौं । वाणिज्य बैंकहरूले मंसिरका निम्ति पनि ब्याजदर घटाएका छन् । 

कात्तिकमा २० वाणिज्य बैंकको ब्याजदर औसत छ दशमलब एक आठ प्रतिशत रहेकोमा आगामी महिना मंसिरमा शुन्य दशमलब दुई शुन्य प्रतिशत विन्दुले ब्याजदर घटाइएको हो । 

ब्याजदर घटाए पछि २० वाणिज्य बैंकका औसत ब्याजदर मंसिरमा ५ दशमलब नौ आठ प्रतिशत कायम हुने भएको छ । बाणिज्य बैंक मध्ये मंसिरका निम्ति ११ वटाले ब्याजदर घटाएका छन् । आठ वाणिज्य बैंकले ब्याजदर स्थिर राखेका छन् । 

राष्ट्रिय वाणिज्य बैंकले भने कात्तिकको तुलनामा शुन्य दशमलब दुई शुन्य प्रतिशत विन्दुले ब्याजदर बढाएको छ । सबै भन्दा बढी माछापुच्छ्रे बैंकले ब्याजदर एक प्रतिशत विन्दुले घटाएर मंसिरमा ६ प्रतिशत ब्याज दिने जनाएको छ । मंसिरमा पनि ब्याजदर घटाउने नबिल, ग्लोबल आइ.एम.ई. लगायतका बैंहरूको पुसमा पनि कर्जाको ब्याजदर घट्ने देखिएको छ । 

हिमालयन, एन.आई.सी. एसिया, प्रभु, नेपाल बैंक, नेपाल एस.वि.आई. , एभरेष्ट, एन.एम.बि. लगायतका बैंकहरूले मंसिरमा पनि कात्तिकै निक्षेपको ब्याजदरलाई निरन्तरता दिएका छन । यस्तै माछापुच्छ्रे, स्टाण्डर्ड चार्टर्ड सिद्धार्थ, एन.मए.बि. लगायतका बैंकले भने लामो अवधिको मुद्दती निक्षेपको ब्याजदर घटाएका छन् । 

मंसिरका लागि नेपाल इन्भेष्टमेन्ट मेगा बैंकले बढी अवधिको मुद्दती निक्षेपको ब्याजदर बढाएको छ । मंसिरमा केही बैंकले एक वर्ष भन्दा बढी अवधिको मुद्दती निक्षेपको ब्याजदर घटाए पनि अधिकांश बैंकहरूले कात्तिककै निक्षेपको ब्याजदरलाई निरन्तरता दिएका हुन् । 

गत आर्थिक वर्षको कात्तिक महिनायता बैंकहरूले निरन्तररुपमा निक्षेप र कर्जाको ब्याजदर घटाइरहेका छन् । साधारण मुद्दती निक्षेपमा बैंकहरूले आवधिका आधारमा न्युनतम तीन दशमलब दुई पाँच प्रतिशत देखि अधिकतम छ दशमलब सात नौ प्रतिशत ब्याजदर तोकेका छन् ।