दार्चुलामा जिप दुर्घटना हुँदा ६ जनाको मृत्यु

दार्चुला । दार्चुलामा जीप दुर्घटना हुँदा ६ जना यात्रुको मृत्यु भएको छ । 

मालिकार्जुन गाउँपालिका वडा नम्बर ३ मडमा लागेको मालिकार्जुन जात्रा बाट फर्कदै गरेका यात्रु चढेको म १ ज ३३८  नम्बरको जीप शुक्रबार बिहान ३ बजे शैल्यशिखर नगरपालिका –६ ग्वानीको सिराडी धारमा दुर्घटना हुँदा उनीहरुको मृत्यु भएको प्रहरीले जनाएको छ । 

दुर्घटनामा ज्यान गुमाउनेहरुको पहिचान खुल्न बाँकी रहेको प्रहरीले जनाएको छ ।  जिपमा रहेका अन्य ७ जना यात्रु घाईते भएका छन । उनीहरुलाई उद्धार गरेर नजिकैको स्वास्थ्य संस्थामा उपचारका लागि पठाइएको छ ।

जिपमा जात्रा बाट गोकुलेश्वर तर्फ फर्कदै गरेका यात्रुहरु चढेका थिए । जीप सडक बाट करिब ३ सय मिटर तल खसेको प्रहरीले जनाएको छ । दुर्घटनाको कारण खुलेको छैन । प्रहरीले उद्धार पछि थप अनुसन्धान अघि बढने जनाएको छ ।