बाइडन र ट्रम्प बीच ह्वाइटहाउसमा भेटवार्ता

एजेन्सी । नवनिर्वाचित अमेरिकी राष्ट्रपति डोनाल्ड ट्रम्प र राष्ट्रपति जो बाइडेन बीच पहिलो पटक भेटवार्ता भएको छ । राष्ट्रपति कार्यालय ह्वाइट हाउसमा भएको भेटमा दुवै नेताले एक अर्कासँग हात मिलाएका छन् । 

अन्तर्राष्ट्रिय सञ्चार माध्यमका अनुसार बाइडेनले राष्ट्रपति चुनावमा विजयी भएकोमा ट्रम्पलाई बधाई दिएका छन् । राष्ट्रपति बाइडेनले सत्ताको सहज हस्तान्तरणको विषय पुनः दोहोर्‍यएका छन । प्रत्युत्तरमा ट्रम्पले सत्ता हस्तान्तरण सहज रुपमा हुने विश्वास व्यक्त गर्नुका साथै बाइडनलाई धन्यवाद दिएका छन् । दुई नेता बीचको वार्तालाप यसअघि दुवैले गर्दै आएको एक अर्काको कटु आलोचनाको ठीक विपरीत रहेको बताइएको छ । 

ट्रम्पले जनवरी २० मा राष्ट्रपति पदको सपथ लिनेछन् । यस बीच ह्वाइट हाउसमा सत्ता हस्तान्तरणको प्रक्रिया शुुरु भएको छ । अमेरिकामा निर्वाचन पछि वर्तमान राष्ट्रपतिले आगामी राष्ट्रपति सँग ह्वाइट हाउसमा औपचारिक भेट गर्ने चलन रहँदै आएको छ । यो बैठकलाई सत्ता हस्तान्तरण प्रक्रियाको सुरुवातका रुपमा हेर्ने गरिएको छ । 

डोनाल्ड ट्रम्पले २०२० मा जो बाइडेन सँग राष्ट्रपति चुनाव हारेपछि उनले बाइडेनलाई निमन्त्रणा पठाएका थिएनन् । प्रथम महिला जिल बाइडेनले ट्रम्प पत्नी मेलानियालाई पनि ह्वाइट हाउसमा निम्तो दिएकी थिइन् । तर, यसपटक मेलानियाले डोनाल्ड ट्रम्प सँग ह्वाइट हाउस गइनन् । यसैबीच अमेरिकी संसदको माथिल्लो सदन सिनेट पछि अब तल्लो सदन हाउस अफ रेप्रिजेन्टेटिभ्समा पनि रिपब्लिकनले बहुमत सिट जित्ने निश्चित देखिएको छ ।  

नोभेम्बर ५ मा राष्ट्रपतीय निर्वाचनका साथै तल्लो सदनका सबै ४ सय ३५ र माथिल्लो सदनका १ सय मध्ये ३४ सीटका लागि पनि मतदान भएको थियो । दुवै सदनमा रिपब्लिकनको पकड हुँदा ट्रम्प थप शक्तिशाली हुने देखिएको छ ।